„ეს არის მზადება საქართველოს დესტაბილიზაციისთვის. ეს არის გუნდი, რომელიც გაერთიანებულია შეთქმულებაში საქართველოს წინააღმდეგ. სხვა ახსნა ამას, რაც დღეს ვიხილეთ ჩვენი ოპონენტების მხრიდან, არ აქვს“,- განაცხადა პარლამენტის ვიცე-სპიკერმა გიორგი ვოლსკიმ პარლამენტის სხდომაზე ოპოზიციაზე საუბრისას.
მისივე თქმით, ოპოზიცია აცხადებს, რომ საქართველოს ხელისუფლებას ევროპელ პარტნიორებთან მუშაობა დააკლდა.
„ოპოზიციის მხრიდან აქცენტი გაკეთდა ორბანზე და მასთან შეხვედრაზე, ჯერ ერთი, ორბანი მხარს გვიჭერს, მეორეც, აქვს გარკვეული პოზიციები, რომელსაც ჩვენც ვიზიარებთ, თუნდაც კონსერვატიული თვალსაზრისით. ვის დააკლდა მუშაობა, რომელი ევროპელი ლიდერი გამოგვრჩა? ვის არ შევხვდით?“- განაცხადა გიორგი ვოლსკიმ და ბოლო დროს ბრიუსელსა და ესპანეთში გამართული შეხვედრები დაასახელა.
მანვე ოპოზიციის იმ ნაწილზე გაამახვილა ყურადღება, რომელიც სუს-ს აკრიტიკებს.
„ემზადებიან იმისათვის, რათა ქვეყანაში დესტაბილიზაცია შექმნან. რატომ აკრიტიკებთ სუს-ს? იმიტომ რომ მოიპოვა ზუსტი მასალები თუ როგორ ამზადებენ ახალგაზრდებს იმ უბედურებისთვის, რაშიც უნდა გახვიონ ჩვენი ქვეყანა“, – განაცხადა გიორგი ვოლსკიმ.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
