,,დროამ” და ,,გირჩი – მეტი თავისუფლებამ” ერთობლივ პროექტზე დაიწყეს მუშაობა. mona.ge – ასე ჰქვია ვებ-რესურს, რომელიც შეიქმნა ინტერნეტ-სივრცეში და რომლის ფარგლებშიც იარსებებს სივრცე, სადაც ყველა იმ საჯარო მოხელის ინფორმაცია განთავსდება, ვინც, თავისი ქმედებებით, ხელს უშლიან ქვეყნის ევროინტეგრაციის პროცესს. თემასთან დაკავშირებით ჟურნალისტებთან კომენტარი გააკეთა ,,გირჩი – მეტი თავისუფლების” თავმჯდომარემ, ზურაბ ჯაფარიძემ:
,,ყველას სახელს და გვარს დავუტოვებთ შთამომავლობას, უსასრულოდ შევინახავთ და მომავალ თაობას ეცოდინება, ვინ იყვნენ ქვეყნისთვის ამ კრიტიკულ მომენტში, როცა ჩვენ გვქონდა სერიოზული შანსი და ჯერ კიდევ გვაქვს, რომ ძალიან სწრაფი ნაბიჯებით წავიდეთ წინ ევროპისკენ, NATO-სკენ და ვინ უშლიდა ხელს ამაში!
კომუნიკაცია უკვე გვაქვს დიპლომატიურ მისიებთან. ყველანაირად შევეცდებით, რომ ეს ხალხი, ან მათი ოჯახის წევრები თუ გადაწყვეტს, რომ ქვეყნიდან გაიქცნენ, ანუ აქ, ჩვენ დაგვტოვონ სიღარიბეში, რუსულ სივრცეში და უბედურებაში, თვითონ თავი დააღწიონ და ნორმალურ დასავლურ ქვეყანაში გაიქცნენ, ყველანაირად შევეცდებით, რომ ამაში ხელი შევუშალოთ“, – განაცხადა ზურაბ ჯაფარიძემ.
ახალ პროექტთან დაკავშირებით განმარტება გააკეთა, ასევე, ,,დროას” ლიდერმა ელენე ხოშტარიამ:
“სისტემური მხილების მექანიზმის შექმნა არის საიტი mona.ge. რომელშიც სისტემატიზებული იქნება ყველა ის თანამშრომელი სუს-ის, პროკურორი, მოსამართლე, მოძალადე, სსიპ-ის თანამშრომელი, რომელიც რეალურად პარტიას ემსახურება და არა სახელმწიფოს და რომლებზეც დგას ეს რუსული სისტემა“, – აღნიშნავს ელენე ხოშტარია.
ავტორი
ნინი ხიჯაკაძე
