„გვაქვს ორი მთავარი საკითხი – უნდა მოხდეს ფარცხალაძის დაკავება და ეროვნული ბანკის ბრძანება დაუყონებლივ უნდა გაუქმდეს. საზოგადოებას პასუხი უნდა გასცეს ოცნებამ“, – ასე ეხმაურება „სტრატეგია აღმაშენებლის“ თავმჯდომარე, გიორგი ვაშაძე გავრცელებულ ინფორმაციას, რომ ოთარ ფარცხალაძე საქართველოში იმყოფება.
როგორც ოპოზიციონერი დეპუტატი აღნიშნავს, „ქართულმა ოცნებამ“ უკან დაიხია, როცა ფარცხალაძეს მოქალაქეობა შეუწყვიტა, თუმცა აუცილებელია, რომ მოხდეს მისი, როგორც რუსეთის ჯაშუშის სასწრაფოდ დაკავება და გამოძიების დაწყება.
მისივე თქმით, ყველა უწყება, ვინც ფარცხალაძეს არ აკავებს, საკუთარი თავის ლუსტრაციას ახდენს:
„გუშინ ჩვენ დავინახეთ „ქართული ოცნება“ როგორ ჩადგა ჯაშუშის დამცველის ფუნქციაში. მათ მოუწიათ უკან დახევა და ფარცხალაძეს მოქალაქეობა შეუწყვიტეს, მაგრამ ვსვამ მთავარ კითხვას – რუსეთის მოქალაქე ხომ არის უკვე ფარცხალაძე, რატომ არ არის დაკავებული?
გუშინ უტყუარად დადასტურდა საჯარო რეესტრის ამონაწერებით, ჟურნალისტებზე თავდასხმით, რომ ფარცხალაძე იმყოფება საქართველოში, შესაბამისად, ჩვენი კითხვა არის ის, რომ რატომ არ ხდება ფარცხალაძის დაუყონებლივი დაკავება რუსეთის სასარგებლოდ ჯაშუშობაში?
სუს-ი და ყველა სამართალდამცავი ორგანოები, რომლებიც არ აკავებენ რუს ჯაშუშ ფარცხალაძეს, პირდაპირ საკუთარი თავის ლუსტრაციას ახდენენ. კითხვას ვუსვამ „ქართულ ოცნებასაც“, სუს-საც და ყველა უწყებას, რატომ არ ახდენთ ფარცხალაძის დაკავებას?
ორი მთავარი საკითხი, რაც ახლა გვაქვს – უნდა მოხდეს ფარცხალაძის დაკავება და ეროვნული ბანკის ბრძანება დაუყონებლივ უნდა გაუქმდეს. ჩვენთვის მთავარია, საზოგადოებას პასუხი გასცეს „ოცნებამ“, თუ რატომ არ ხდება ფარცხალაძის დაკავება, ამიტომ კითხვას უნდა გასცეს ყველა უწყებამ პასუხი – კაცი არის მხილებული ჯაშუშურ საქმიანობაში, ამაზე დიდი დანაშაული არ არსებობს“, – განაცხადა გიორგი ვაშაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” საზოგადოებასთან ურთიერთობის სამსახური ავრცელებს
