განათლების ყოფილი მინისტრი, პოლიტიკის ექსპერტი გია ნოდია კონკრეტულ შეფასებებს აკეთებს ევროინტეგრაციის პროცესში სხვადასხვა სახის პოზიციებთან დაკავშირებით:
“საქართველოში ევროკავშირის წევრობის სტატუსზე არსებობს ორი ძირითადი პოზიცია (ვგულისხმობ არსს და არა ფორმალურ რიტორიკას):
- მთავრობა: თუ მოგვცემენ მოგვცენ, თუ არა და, აი დარდი.
- პროდასავლური საზოგადოება: მართალია, არ ვიმსახურებთ, მაგრამ მაინც უნდა მოგვცენ.
ჩემთვის მთავრობის პოზიცია მიუღებელია, მაგრამ, მისი ხედვიდან და ინტერესებიდან გამომდინარე, ლოგიკურია. პროდასავლური საზოგადოების პოზიცია ჩემთვის ემოციურად უფრო ახლოა, მაგრამ ლოგიკური არანაირად არ არის.
ზოგი პროევროპელის არგუმენტი: “თუ ევროპამ სტატუსი არ მოგვცა, ესე იგი დაგვიკიდა და ბიძინას მწვანე აუნთო, რომ რუსეთისკენ წაგვიყვანოს”, უმწეოა. შარშან ივნისში რომ არ მოგვცა, ეს შედეგი დადგა? ახლა რატომ იქნება “დაკიდება”?
(არ ვაკეთებ პროგნოზს, რომ ევროკავშირი სტატუსს არ მოგვცემს. შეიძლება მაინც მოგვცეს, მაგრამ მაშინ ეს მისი მხრიდან არ იქნება ლოგიკური: შარშან ივნისში თუ არ გვეკუთვნოდა, ახლა რა გამოსწორდა?).
თუ ევროპა გვინდა, ბიძინას მეტ-ნაკლებად ნორმალური მთავრობით ჩანაცვლებაა მთავარი, სტატუსითაც და უსტატუსოდაც. პროგრესული „ინფლიენსერების“ მიერ იმ იდეის გამყარება, თითქოს სტატუსის არმოცემა ევროპისგან ჩვენს „გაწირვას“ ნიშნავს, თავისი ობიექტური შინაარსით ანტიდასავლური პროპაგანდა და ტყუილის ტირაჟირებაა.
როგორც „ოცნებას“ მზად აქვს რიტორიკა სტატუსის არმიღების სცენარისთვის, ასევე უნდა ჰქონდეს მეორე მხარესაც. ისტერიკა რაციონალური რეაქცია არ არის.
გზავნილი უნდა იყოს ცხადი: სტატუსი გვინდა, მაგრამ “ოცნებამ” ყველაფერი გააკეთა, რომ ევროკავშირისთვის სტატუსის მინიჭების საშუალება არ მიეცა. “ოცნებასთან” უნისონში ევროპის დადანაშუალება იქნება სიბეცე“, – წერს ფეიუსბუქის პირად გვერდზე გია ნოდია.