ახალი სასწავლო წლის მოახლოებას კონკრეტული ანალიზით და განმარტებებით, მძიმე პრობლემების გამოკვეთითა და მწვავე შეფასებებით ეხმაურება “სტრატეგია აღმაშენებლის” პოლიტსაბჭოს წევრი, განათლების მიმართულების ხელმძღვანელი, ნანა ტოხვაძე:
“მოდის ახალი სასწავლო წელი კვლავ ძველი, სისტემური გამოწვევებით! შოვი და მერე გურია რომ დაგემართება ქვეყანას, ცოცხალი რომ ხარ, თითქოს უკვე უნდა კმაყოფილდებოდე. ცოცხალ ადამიანს კი მეტი გინდა და რა, როგორ, რანაირად აჯობებდა შენს სახელმწიფოში ამის ართქმა არ ივარგებს!!
ქვეყნის წარმატების მყარი საფუძველი განათლების გარეშე არ არსებობს, არც არასდროს უარსებია და ვერცერთი საზოგადოება ვერ განვითარდება თუ განათლებაზე არ ზრუნავს!
საჯარო სკოლის დირექტორების კონკურსი უკონკურსოდ ჩავარიხინეთ, რადგან 2074 საჯარო სკოლიდან, მხოლოდ 18.6%-შია “ასარჩევი” კანდიდატი. 1692 სკოლა არჩეული საგანმანათლებლო ლიდერის გარეშე რჩება და სუს-ის მითითებებით კოხტად დაინიშნებიან მთავრობისადმი ლოიალურად განწყობილი, “გამწვანებული” მ.შ. კანდიდატები!
მასწავლებელს ეროვნულ დღეს კი დავუწესებთ და დიდი ამბავი თუ საბაზისო ხელფასი ბოლო ათწლეულია თითქმის არ შეცვლილა?!
2012 წელს- 245 ლარი;
2013 წელს -305 ლარი;
2023 წელს – 405 ლარი.
პედაგოგებს დავატრენინგებთ, სტატუსებს შევაცვლევინებთ და უცვლელად სავალალო სასწავლო შედეგებს ვინ დაეძებს?! რეპეტიტორები მიხედავენ, ვისაც ფული და პატრონი ხელს შეუწყობს!
სასკოლო კვების პროგრამის დანერგვა რაში გვეჩქარება, მერე რა რომ 18 წლამდე ასაკის 340281 ბავშვი სოციალური შემწეობის მიმღებთა ბაზაშია რეგისტრირებული და ოფიციალურად შიმშილობს!
ორ და სამცვლიან დატვირთვასაც მშვენივრად უძლებს თბილისის სკოლები, 30-35 წუთიან გაკვეთილებსაც გადასარევად “ვეგუებით” მთავარია, ბავშვების ტრანსპორტით უზრუნველყოფისთვის და გაჭიმული სარემონტო-სარეაბილიტაციო სამუშაოებისთვის მოგებული ტენდერებით მილიონები იშოვონ ჩინოვნიკებმა და მათმა გარემოცვამ.
პანდემიის შემდეგ რომ აუშენებელ-დაუმშვენებელი დარჩა სკოლები და მარტივად სამეზობლოს ნაგავსაყრელადაა ქცეული, განა გვაღელვებს?!
ჩამოსათვლელი კიდევ ბევრია😢 ვიდრე მოქმედებაზე არ გადავალთ, მომავალი თაობების მიმართ უდიდეს დანაშაულს ჩავდივართ!!!” – წერს ფეისბუქის პირად გვერდზე ნანა ტოხვაძე.
