ჩოხატაურში, ნოდარ დუმბაძის პარკის ნაწილის გასხვისების საკითხის, “ნაციონალური მოძრაობის” წევრების მხრიდან გაპროტესტებას დაპირისპირება და ძალადობა მოჰყვა, რასაც მწვავე შეფასებებით ეხმაურება “გამარჯვების პლატფორმაში” შემავალი პარტია “სტრატეგია აღმაშენებლის” გენერალური მდივანი, პარლამენტის წევრი პაატა მანჯგალაძე:
“ “ქართული ოცნება” რა დღეში ჩაგაგდოთ სიხარბემ, როგორ სულ დაკარგეთ ადამიანის სახე?!
რას ითხოვდნენ ჩოხატაურში შეკრებილი ადამიანები ნოდარ დუმბაძის სკვერი იქნებ მაინც შევინარჩუნოთო და ამის გამო ფიზიკურად უსწორდებით? რომელი უფლებით?!
ვის წარმოადგენთ?
ვინც დაგეგმეთ, ვინც განახორციელეთ, გგონიათ ადამიანები ხართ ამის მერე?
მთავარია, რამე არ მოგაკლდეთ და მზად ხართ ადამიანი დაგლიჯოთ?
ესაა ქოცური დემოკრატიის სახე, ესაა მათი ადამიანობა, ასე ესმით კულტურული მემკვიდრეობის, ტრადიციებისა და ქრისტიანობის დაცვა.
ოცნების ლიდერებო გამოდით და ფარისევლურად მაინც დაგმეთ ძალადობა, თორემ ხომ იცით გამოცდილია ვინც ქარს დათესავს ქარიშხალს მიიღებს ცხვირში.
და კიდევ, გომელაურო თუ საერთოდ რამეს წარმოადგენ ეხლავე დააკავე ეს ზონდერ მოძალადეები.
არა ძალადობას! არა ქოცობას!“ – აცხადებს პაატა მანჯგალაძე.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
