მწერალთა სახლის დირექტორის თანამდებობაზე “ქართული ოცნების” დეპუტატის, ქეთი დუმბაძის დანიშვნის ფაქტს არაერთგვაროვანი შეფასებები ჰქონდა საზოგადოებასა და პოლიტიკურ წრეებში. კულტურის სამინისტროს საკადრო გადაწყვეტილებას პოზიტიური პოსტით, ემოციური შეფასებებით ეხმაურება ისტორიულ მეცნიერებათა დოქტორი, პროფესორი, ხელოვნების სასახლის დირექტორი გიორგი კალანდია:
“ქეთი დუმბაძეს ადრეული ახალაგაზრდობიდან ვიცნობ, შეიძლება ითქვას ის ჩემი ყრმობის მეგობარია, მაგრამ ამჟამად ეს არ არის მთავარი!
ღირსშესანიშნავია ის, რომ იშვიათად შემხვედრია ქეთისთანა კეთილშობილი, საქმეზე შეყვარებული და გაწონასწორებული ადამიანი, ქეთი გააბრაზო და მით უფრო წყობიდან გამოიყვანო წარმოუდგენელი მგონია…
ქეთიმ ბოლო რამდენიმე წელიწადში თანამედროვე ქართული მწერლობისათვის ბევრი კარგი საქმე აკეთა, მარტო მისი “ცოცხალი წიგნები” რად ღირს!
მინდა მივულოცო მწერალთა სახლის ხელმძღვანელობა, ვუსურვო წარმატება, ვიცი რომ ყველა გამოწვევას ღირსეულად გაართმევს თავს, ისიც ვიცი რომ რაც არ უნდა მოხდეს ქეთი ერთი წამით არ შედრკება და აიცრუებს გულს, რადგან ქეთის მამა, დიდი ნოდარ დუმბაძე წერდა: ” სამშობლო უფრო მეტად გაჭირვება და ტკივილია, ვიდრე დალხინება და დღესასწაული” ჰოდა ამ გაჭირვებაში მტკიცედ დექ ჩემო ძვირფასო მეგობარო“, – წერს ფეისბუქის საკუთარ გვერდზე გიორგი კალანდია.
