გაერთიანებული ოპოზიციის ერთ-ერთი ლიდერი, “ახალი საქართველოს” თავმჯდომარე ხელისუფლებასა და ოპოზიციას შორის მოლაპარაკებების მეორე რაუნდს ეხმიანება. გიორგი ვაშაძის აზრით, მიუხედავად “ყინულის დნობისა” პოლიტიკურ პროცესებში, მაინც ნულოვანია ნდობა საზოგადოებისა და ოპოზიციის მხრიდანა „ქართული ოცნების“ მიმართ და რეალურად მიმდინარეობს ხელისუფლებიდან მათი გაცილების პროცესი:
„შეხვედრის მეორე რაუნდი ასევე მნიშვნელოვანი მიღწევაა ჩვენი მშვიდობიანი, არაძალადობრივი წინააღმდეგობის მოძრაობისა და საერთაშორისო დიპლომატიური ზეწოლის და წნეხისთვის.
მოვუსმენთ „ქართულ ოცნებას“, რომელთაც უნდა ეფიქრათ იმ მოდელთან დაკავშირებით, რაც ჩვენ შევთავაზეთ. გერმანული მოდელი ქართული მოდიფიკაციით არის დღის წესრიგში და შესაბამისად, ამის მიხედვით იქნება რეაგირება.
პირდაპირ ვამბობ, ყინულმა დაიწყო დნობა, მაგრამ ნდობა საზოგადოების მხრიდანაც და ჩვენი მხრიდანაც „ქართული ოცნების“ მიმართ ნულოვანია, რომელიც როგორც წესი, ტყუილებით გამოირჩევა ხოლმე. ძალიან ბევრი გვაქვს სამუშაო იმისთვის, რომ ის რაც საზოგადოებას უნდა იქცეს რეალურ კანონპროექტად, საქართველოში ჩატარდეს ნორმალური არჩევნები და არა ის არჩევნები, რომელშიც ხელისუფლებას მიიტაცებს ვინმე კონკრეტული ადამიანი.
დღესავით ნათელია რომ „ქართულმა ოცნებამ“ საკუთარი თავი ამოწურა და მიმდინარეობს ხელისუფლებიდან მათი გაცილების პროცესი, ყველაზე მეტად სწორედ საჯარო მოხელეებს ამოუვიდათ ყელში ხელისუფლება, რომელიც არაფერს აკეთებს ქვეყანაში. სამოქალაქო დაპირისპირება ქართული ოცნების გამო ქვეყანაში არ მოხდება, რაც არ უნდა ძალადობა გამოიყენონ, ჩვენ ძალადობას მშვიდობით ვპასუხობთ და ამაშია ჩვენი ძალა,” – განაცხადა გიორგი ვაშაძემ.
