მხატვარი, გია ბუღაძე სააგენტო ,,პარალელთან” ინტერვიუში საუბრობს ,,ერთიანი ნაციონალური მოძრაობისა” და ,,სტრატეგია აღმაშენებლის” გაერთიანებაზე – ,,გამარჯვების პლატფორმაზე”. მისი განმარტებით, ქვეყნისთვის სასიკეთო იქნება, რაც უფრო მეტი საერთო პლატფორმა შეიქმნება ოპოზიციურ სპექტრში:
,,მე მივესალმები ყველანაირ ოპოზიციურ გაერთიანებას. არ მაღიზიანებს და არანაირი პოლიტიკური ამბიციები არ მაქვს. ერთადერთი ამბიცია, სურვილი, რაც მაქვს – მინდა, რომ მოვიშორო ეს მოღალატე ხელისუფლება, რუსული ხელისუფლება. ამას ხელს შეუწყობს გაერთიანებები, რაც უფრო მდიდარი იქნება ამ რუსული ხელისუფლების მოშორებისთვის, მივესალმები ყველანაირად.
თუ სხვებიც გამოძებნიან საერთო ენას ერთმანეთთან, კარგი იქნება. რამდენიმე ოპოზიციური ჯგუფი თუ ერთად იქნება, მაგას რა ჯობია, თუ იქნებიან გაერთიანებულები, რაღაც მხრივ, რომ მოვიშოროთ რუსული ხელისუფლება და რუსეთის საშინელი გავლენები ჩვენს ქვეყანაზე.
რაც შეეხება გიორგი ვაშაძეს, რაც არ უნდა მტრულად იყვნენ ამ ახალგაზრდა ადამიანის მიმართ დამოკიდებულნი, მეტ-ნაკლებად გულში მაინც აღიარებენ, რომ ამ ადამიანს აქვს რაციონალური გონება და არის შემოქმედებითი ნატურა. ის ხან კონკრეტულ პარტიებთანაა კავშირში, ხან სხვაგან შეიძლება წავიდეს, ეს მიუთითებს, რომ ადამიანი ერთ ადგილას არ დგას. მისი ეს ხასიათი მესმის და მომწონს კიდეც, სიმართლე გითხრათ.
რეალურად, პოლიტიკა და ყველა საქმიანობა უნდა იყოს დაკავშირებული ადამიანების, საზოგადოების რთულ ურთიერთობასთან. დღევანდელი მსოფლიო პოლიტიკა უმძიმეს მდგომარეობაშია. საერთოდ, საქართველო ძალიან მნიშვნელოვან გზასაყარზე დგას. ყველაფერი სწრაფად იცვლება, ისე ხშირად იცვლება ხოლმე – შეიძლება, გაოცდე კიდევაც. გიორგის ტრანსფორმაციები ჩემთვის არ არის მიუღებელი, პირიქით – კიდევ ერთი ნიშანია იმისა, რომ ეძებს ფორმატს, რომელიც შესაბამისი იქნება რეალობისა, რომელიც დღეს არის. მისი აქტუალობა ნამდვილად სახეზეა.
კიდევ ერთხელ ვამბობ, მხოლოდ და მხოლოდ დადებითად ვაფასებ ამ გაერთიანების მცდელობას. ვფიქრობ, რომ ამას შედეგი ექნება. ჩემი სურვილია სხვა აქტიურები მიზიდულობის ცენტრები გაჩნდეს საქართველოში, რათა დავამარცხოთ რუსული რეჟიმი”, – განაცხადა გია ბუღაძემ.
ავტორი
ნინი ხიჯაკაძე
