ტვ ,,პირველის” საინფორმაციო სამსახურის უფროსის, ნოდარ მელაძის მანქანის ძარცვასთან დაკავშირებით გამოძიება დაიწყო. მანქანიდან მხოლოდ მეხსიერების ბარათია წაღებული. დაკავებულია არასრულწლოვანი პირი.
საგამოძიებო სამსახურში ჩვენების მიცემის შემდეგ, ნოდარ მელაძემ კომენტარი გააკეთა, სადაც აცხადებს, რომ აღნიშნული ქმედება, მისი ვარაუდით, პროფესიულ საქმიანობას უკავშირდება და მიაჩნია, რომ ძარცვა წინასწარ ორგანიზებული იყო:
,,მივეცი ჩვენება, სადაც მკაფიოდ დავაფიქსირე, რომ მომხდარი უკავშირდება, ჩემი აღქმით, ჩემს პროფესიულ საქმიანობას. მითხრეს, რომ დაკავებული არის ერთი პირი, რომელიც არის არასრულწლოვანი, რაც ადასტურებს იმ ვერსიას, რაც მანამდე მქონდა, რა გზითაც წავიდოდნენ.
შესაბამისად, ახლა პოლიციამ, საგამოძიებო უწყებამ უნდა დაასაბუთოს, არასრულწლოვანი მანქანაში რომ შეძვრა, იქიდან არ წაიღო არც საათები, არც სათვალეები, არაფერმა არ დააინტერესა და დააინტერესა მხოლოდ მეხსიერების ბარათმა, რომელიც რაში სჭირდებოდა და რა დანიშნულება აქვს, შეიძლება არც იცოდეს. ეს, შესაბამისად, უდიდესი საეჭვო გარემოებაა.
მსგავს საქმეებზე ხომ ვიცით, რომ ფორმალური გამოძიება ხდება ხოლმე. გამოავლენენ სიმბოლურად ვიღაც დაკავებულს და ამით ისტორია მთავრდება.
დღეს, ჩემთვის პირადად მიღებული ინფორმაციით დადასტურდა, რომ ეს იყო წინასწარ, კარგად ორგანიზებული ღონისძიება ჩემი, როგორც გამომძიებელი ჟურნალისტის დასაშინებლად”, – განაცხადა ნოდარ მელაძემ.
ავტორი
ნინი ხიჯაკაძე
