საქართველოს ელჩი უკრაინაში, გიორგი ზაქარაშვილი უკრაინის დატოვების შემდეგ განმარტებებს აკეთებს უკრაინასთან მიმართებაში საქართველოს მხრიდან განხორციელებულ ქმედებებთან დაკავშირებით და კონკრეტულ ეჭვებს გამოთქვამს, რომ ვიღაცის ინტერესშია ორ ქვეყანას შორის ურთიერთობების გაფუჭება:
,,გარკვეულ ძალებს აწყობდათ ამ საკითხის აქტუალიზაცია. ამასთანავე, საქართველოს და უკრაინის ურთიერთობების გაფუჭება. როგორც არა ერთხელ ვთქვი, კიდევ გავიმეორებ, ჩემი აზრით, ეს გადაწყვეტილება უკრაინის მხრიდან იყო დიდი შეცდომა, რაც გამოჩნდება კიდევაც უახლოეს მომავალში.
უკრაინაშიც და საქართველოშიც არიან პოლიტიკური ძალები, სამწუხაროდ, ვის ინტერესშიც არ არის ორმხრივი ურთიერთობის განვითარება, ერთმანეთის მხარდაჭერა. შეგახსენებთ, რომ როდესაც რეალიზაცია მოხდა ზოგადად ევროინტეგრაციული ტრიოს იდეის, ეს საკმაოდ წარმატებული პროექტი იყო. როგორც პროექტმა და ტრიომ, სამი ქვეყნის ერთიანობამ ამ ევროინტეგრაციის გზაზე, საკმაოდ კარგი შედეგები გამოაჩინა. შესაბამისად, ვიღაცას დღესაც სჭირდება ამ ერთობის დარღვევა, საქართველოს ე.წ. ასე ვთქვათ – ცოტა ჩამორჩენა ამ თემაში, რაც შემდეგ პოლიტიკური მიზნებისთვის გამოიყენება. ეს არის, ალბათ, სრული დიდი მიზანი და არის ცალკეული ფრაგმენტები, რომელთა შორის ერთ-ერთი არის, ბუნებრივია, მიხეილ სააკაშვილის საკითხი.
საქართველოს გარშემო არა ერთი რუსეთის ბაზაა განლაგებული. შესაბამისად, ესეთ პირობებში, რასაც საქართველო აკეთებს უკრაინისთვის, როდესაც არის უპირობო პოლიტიკური, ჰუმანიტარული მხარდაჭერა, არ ვიცი, მეტი რა შეგვიძლია და არ ვაკეთებთ? ზოგჯერ მართლა ვუსვამდი ამ შეკითხვას უკრაინელ მეგობრებს. რას არ ვაკეთებთ იმას, რაც შეგვიძლია?! – ფაქტიურად, ამაზე პასუხის გაცემა ძალიან რთულია.
თავიდანვე, ის მოთხოვნა, რომ უნდა ჩამოვიდე და ვისაუბრო პოლიტიკურ ჭრილში სააკაშვილის საკითხზე, არ არის მართებული, ვინაიდან ეს შეუძლებელია. არის სასამართლოს გადაწყვეტილება, რომელსაც პატივი უნდა სცეს ყველამ, მათ შორის, საქართველოს ხელისუფლებამ“, – განაცხადა გიორგი ზაქარაშვილმა.
ავტორი
ნინი ხიჯაკაძე
