2021 წლის 5 ივლისის მოვლენებიდან 2 წელი გავიდა. ,,ქართული ოცნების“ თავმჯდომარე ირაკლი კობახიძე აცხადებს, რომ 5 ივლისს მოვლენების დროს ძალადობრივი ქმედებები სპონტანურად განხორციელდა, არ იკვეთება ორგანიზატორი, რის გამოც შსს-ს რეაგირება გაუჭირდა. ამასთან, მმართველი პარტიის ლიდერი 5 ივლისისა და 7-8 მარტის მოვლენებს შორის შედარებას ახდენს:
,,ორგანიზატორები 5 ივლისის დანაშაულს არ ჰყავდა.
სამართლებრივად ორგანიზატორების იდენტიფიცირება აქამდე იყო შეუძლებელი. რატომ? იმიტომ, რომ არ დგინდება არცერთი ფაქტი, სადაც მოხდა დანაშაულის ორგანიზება.
დანაშაულის ორგანიზება, ეს არის სამართლებრივი კატეგორია. ორგანიზატორი არ იკვეთება.
სახელმწიფოს ვალდებულებაა დაიცვას ადამიანების უსაფრთხოება. თქვენ გახსოვთ, სამწუხაროდ, როგორ წარიმართა 5 ივლისს მოვლენები. იყო სპონტანური ძალადობა. ამიტომ გაუჭირდა შინაგან საქმეთა სამინისტროს რეაგირება. ამას ჰქონდა ობიექტური მიზეზი.
მე მინდა შეგახსენოთ, როცა აქ ხორციელდებოდა ძალადობრივი შტურმი პარლამენტზე 7-8 მარტს, მაშინ იყო პირდაპირი მოწოდებები. შეკრება იყო ორგანიზებული. უფრო მეტიც, ადამიანებს მოუწოდეს, რომ პარლამენტის შენობისთვის ალყა უნდა შემოერტყათ. ამ ალყას მოჰყვა პირდაპირი ძალადობრივი აქტი.
თუ ჩვენ დაბალი სტანდარტით გავყვებით, ამ შემთხვევაში პირველი არის დასაჭერი გიორგი ვაშაძე, დასაჭერები არიან ოპოზიციის სხვა ლიდერები. კოკა მორგოშიას რომ მოეწოდებინა კონკრეტული ადამიანებისთვის, რომ წადით ამა და ამ ადგილას, მაგალითად, ფიზიკური შეურაცხყოფა მიაყენეთ ამა და ამ ადამიანებს, ეს მოწოდება არ იყო.
თუ მორგოშია დასაჭერია, როგორც ორგანიზატორი, მაშინ ვაშაძე კიდევ უფრო მეტად დასაჭერია“, – განაცხადა ირაკლი კობახიძემ.
ავტორი
ნინი ხიჯაკაძე
