დღეს, პარლამენტში პრემიერ-მინისტრი ირაკლი ღარიბაშვილი ყოველწლიური მოხსენებით წარდგა. მწვავე იყო როგორც მთავრობის მეთაურის, ასევე ოპოზიციის გამოსვლები. ჟურნალისტებთან კომენტარში დაფიქსირებულ პოზიციაში პარტია ,,ქართული ოცნების“ თავმჯდომარე, ირაკლი კობახიძემ ისაუბრა პარლამენტში გამართულ დებატებთან დაკავშირებით და მძიმე შეფასებები გააკეთა ოპოზიციის მიმართ:
,,ნაც. მოძრაობა“ ღიზიანდება, როდესაც მათ საკუთარ სახელს არქმევენ. ეს არის ჩვეულებრივი ,,ომის პარტია“, რომელსაც ქვეყნისთვის ცუდის მეტი არაფერი უნდა. ეს არის რეალობა. ამაზე კიდევ ერთხელ მოუწია, რა თქმა უნდა, პრემიერს აქცენტის გაკეთება. ბუნებრივია, ამაზე ღიზიანდებიან კოლექტიური ,,ნაც. მოძრაობის“ წარმომადგენლები.
რატომ? იმიტომ, რომ მათ ყველაზე კარგად იციან, რომ სინამდვილეში ისინი ჩვენს ქვეყანას მტრობენ. ამას აკეთებდნენ ისინი, როცა ხელისუფლებაში იყვნენ 9 წლის განმავლობაში, ასევე, ახლა, როდესაც 11 წლის განმავლობაში არიან ოპოზიციაში.
მათ, ბუნებრივია, აღიზიანებთ, როდესაც ერქმევათ ის სახელი, რომელიც სინამდვილეში უნდა ერქვათ. ეს არის ომის, რეგრესის პარტია, რომელიც დაკავშირებულია ყველანაირ მტრობასთან ჩვენი ქვეყნის მიმართ, რაც არის ძალიან სამწუხარო მოვლენა“, – განაცხადა ირაკლი კობახიძემ.
ავტორი
ნინი ხიჯაკაძე
