“როგორ იქცევა საქართველოს ხელისუფლება ბოლო თვეებში/წლებში?” – იაგო კაჭკაჭიშვილი

რუსეთში შექმნილი რეალობის გათვალიისწინებით საქართველოს ხელისუფლებათან დაკავშირებით კონკრეტული შეფასებები პუნქტობრივად ჩამოაყალიბა იაგო კაჭკაჭიშვილმა, სოციოლოგიის დოქტორმა, თბილისის სახელმწიფო უნივერსიტეტში სოციოლოგიისა და სოციალური მუშაობის მიმართულების ხელმძღვანელი სოციალურ და პოლიტიკურ მეცნიერებათა ფაკულტეტზე:

“როგორ იქცევა საქართველოს ხელისუფლება ბოლო თვეებში/წლებში?

ა) „აგენტებად“ მოიხსენიებს სამოქალაქო საზოგადოების ორგანიზაციების წარმომადგენლებს და ყველას, ვინც მის ბანაკში არ არის (იმის მიუხედავად, რომ ის ავადსახსენებელი კანონი ჩაუვარდა);

ბ) ახდენს დასავლეთის დემონიზებას, წარმოაჩენს ევროპას და ამერიკას საქართველოს უსაფრთხოების, მისი თვითმყოფადობის მტრად;

გ) აბუჩად იგდებს ევროკავშირის სტრუქტურებს და მათ წარმომადგენლებს;

დ) ახდენს პოლიტიკური ოპოზიციის და თავისუფალი მედიის მარგინალიზებას;

ე) აქცევს სასამართლოს საკუთარი ძალაუფლების ინსტრუმენტად;

ვ) რუსეთ-უკრაინის ომში უკრაინაზე გადააქვს პასუხისმგებლობის ტვირთი და უკრაინის გმირი ხელისუფლება, უბრალოდ, ეზიზღება… და ა.შ.

ზემოაღნიშნული სხვა არაფერია, თუ არა რუსული ავტორიტარული მართვის კლონირების დაუოკებელი მცდელობა საქართველოში. სამწუხაროდ, უნდა ითქვას, რომ ამ გზაზე ქართულმა ოცნებამ არაერთ წარმატებას მიაღწია.

ის, რაც ახლა რუსეთში ხდება, რუსული ავტორიტარული მოდელის ერთგვარი ხარაკირია. პრიგოჟინი პუტინზე უკეთესი არაფრით არ არის, მაგრამ ის შეიძლება აღმოჩნდეს ის ვირუსი, რომელიც რუსული ტოტალიტარიზმის იმუნურ სისტემას დაანგრევს და თავადაც საფლავში ჩაჰყვება.

ჩვენთვის სარგებელი კი ისაა, რომ ამით ხელი შეეწყობა რუსული მართვის კლონირების მცდელობების დასრულებას საქართველოში“, – წერს ფეისბუქის პირად გვერდზე იაგო კაჭკაჭიშვილი.