30-მდე ოპოზიციურმა პარტიამ, საქართველოს პარლამენტის 2020 წლის არჩევნების კონსტიტუციური პირობები შეიმუშავა. დოკუმენტი, რომლის ხელმოწერაც დღეს მოხდა ოპოზიციური პარტიების ლიდერების მიერ, განსახილველად გადაეგზავნება ვენეციის კომისიას და ODIHR-ს.
კანონპროექტის პრეზენტაცია, „ახალი საქართველოს“ თავმჯდომარემ გიორგი ვაშაძემ და კონსტიტუციონალისტმა ვახტანგ ხმალაძემ წარადგინეს. „ახალი საქართველოს“ ლიდერი მოუწოდებს ხელისუფლებას, რომ სახე ოდნავ მაინც შეინარჩუნონ და დაეთანხმონ იმას, რომ ის კანონი, რომელიც ოპოზიციურმა სპექტრმა მოამზადა, არის სრულ შესაბამისობაში კონსტიტუციასთან.
„დამოუკიდებელი კონსტიტუციონალისტები, თუ ვინმეს რამე იურისპრუდენციაში მოეკითხება, დიპლომატიური კორპუსი, საერთაშორისო ორგანიზაციები – ყველა თანხმდება, რასაც ჩვენ წარვადგენთ, არის სრულად კონსტიტუციური. ვინ არ თანხმდება ამას – ის ადამიანები, ვინც ერთხელ უკვე მოგვატყუა და გვითხრა, რომ ვითომ უმრავლესობა არ იყო საკონსტიტუციო და არ მიიღეს ცვლილება. ეს არის წყლის ნაყვა. ისინი არიან კუთხეში მიყენებული და მე ერთ რამეს მოვუწოდებ, შავზე თეთრის მტკიცებით თავის სახეს აუბედურებენ.
მოვუწოდებ, რომ სახე ოდნავ მაინც შეინარჩუნეთ და დაეთანხმეთ იმას, რომ ის კანონი, რომელიც ჩვენ მოვამზადეთ, არის სრულ შესაბამისობაში კონსტიტუციასთან. ის ითვალისწინებს პროპორციული არჩევნების მისწრაფებას და მთავარი, ხალხი გადაწყვეტს, ვინ უნდა იყოს ხელისუფლებაში და არა საარჩევნო სისტემა და არა საარჩევნო სისტემით მანიპულაცია, ეს არის მთავარი მიზანი. ეს არის კარგად გათვლილი საკანონმდებლო პროექტი, რომელიც ეყრდნობა „გერმანულ მოდელს“, მაგრამ ითვალისწინებს ქართულ რეალობას და არის სრულ შესაბამისობაში კონსტიტუციასთან.
არ დაგიმალავთ, კომუნიკაცია გვქონდა დიპლომატიურ კორპუსთან, გავაცანით ეს ყველაფერი. ეუთო-ოდირს მივმართავთ, რომელიც ყველაზე მაღალი სანდოობის არის საერთაშორისო თვალსაზრისით ამ კუთხით და ვამბობთ, მოდით ვენეციის კომისიასაც გავუგზავნოთ, ოდირ-საც გავუგზავნოთ, იტყვიან კონსტიტუციურია, ესე იგი, კონსტიტუციურია და დამთავრდა ამით ყველაფერი“, – განაცხადა გიორგი ვაშაძემ.
