,,მთავარი არხის“ გენერალური დირექტორის გათავისუფლების მოლოდინში ნიკა გვარამიას მეუღლე, სოფო ლილუაშვილი ოჯახთან ერთად რუსთავის ციხესთან იმყოფება. ფორმალური პროცედურების დასრულების მოლოდინში სოფო ლილუაშვილი შეწყალების გადაწყვეტილებაზე ,,მთავარი არხის“ ჟურნალისტთან ემოციურ კომენტარს აკეთებს:
დღეს, რამდენად ელოდით, რომ იქნებოდა ის დღე, როცა მოვისმენდით იმ ფრაზას, რომელსაც ველით ამდენი ხანია? [ჟურნალისტის შეკითხვა]
,,მოლოდინი არ მქონია, მაგრამ ახლა ძალიან ბედნიერი ვარ. კიდევ ერთხელ ვხვდები, რომ სიმართლისთვის ბრძოლას ყოველთვის აქვს აზრი. სულ ამას ვიმეორებ, დღეს, ამის მერე, რომ ,,მხოლოდ წინ, საბოლოო გამარჯვებამდე“ – როგორც ნიკა იტყოდა.
ვულოცავ ყველას იმიტომ, რომ კიდევ ერთხელ – ეს არ იყო მხოლოდ ჩვენი საქმე. ნიკა, როგორც ჩემი მეუღლე, არ მჯდარა საპატიმროში, ეს ყველას გვეხება. მისი თავისუფლება ეხება ყველას! გეხებათ თქვენ – მედიის წარმომადგენლებს, ყველა იმ ადამიანს ვისთვისაც დემოკრატია, სიტყვის თავისუფლება მნიშნელოვანია.
მადლობა თქვენ და ყველას, ვინც მთელი ამ ერთი წლის განმავლობაში ჩემს გვერდით იდგა! ასე, დაუზოგავად ჩემთან ერთად იბრძოდნენ – აი, ამ ბოლო წამამდე. დარწმუნებული ვარ. ნიკას საბოლოო გამარჯვებამდე ჩვენს გვერდით იდგებიან! გილოცავთ ყველას! მხოლოდ წინ, საბოლოო გამარჯვებამდე!“, – განაცხადა სოფო ლილუაშვილმა.
ავტორი
ნინი ხიჯაკაძე
