“სტრატეგია აღმაშენებლის“ ლიდერები გიორგი ვაშაძე და სერგო ჩიხლაძე, ვაშინგტონში ვიზიტის ფარგლებში, სენატორ ჯინ შაჰინსა და მისი ოფისის წარმომადგენლებს შეხვდნენ.
პარტიის საგარეო მდივნის, სერგო ჩიხლაძის განცხადებით, ამერიკელი პარტნიორები გამოხატავენ სრულ მხარდაჭერას საქართველოს დემოკრატიული რეფორმირების პროცესში. ოპოზიციონერი ლიდერის თქმით, განხილულ საკითხებს შორის საქართველოში რეფორმების განხორციელება, „ნატო“-სა და ევროკავშირში ინტეგრაციის დაჩქარება და „შავი ზღვის უსაფრთხოების აქტი“ იყო. აღნიშნულ აქტში საქართველოს დიდი ადგილი ეთმობა და წარმოადგენს მნიშვნელოვან რესურსს ქართული ეკონომიკისთვისა და ქართველი მოსახლეობისთვის:
„გვქონდა შეხვედრები სენატორ შაჰინთან, ჩვენი ქვეყნის ძალიან დიდ და დიდი ხნის მეგობართან, ასევე მის მრჩევლებთან. განვიხილეთ ისეთი საკითხები, როგორიცაა რეფორმების განხორციელება საქართველოში, “ნატო”-ში ინტეგრაციის პროცესის დაჩქარება და რაც ძალიან მნიშვნელოვანია უსაფრთხოების საკითხები, თუ რა სახის უსაფრთხოების გარანტიები შეიძლება ჰქონდეს საქართველოს.
ძალიან მნიშვნელოვანია სენატორ შაჰინის მიერ ინიცირებული “შავი ზღვის უსაფრთხოების აქტი”, რომელშიც ერთ-ერთი მთავარი ადგილი ეთმობა საქართველოს. აქტი გულისხმობს პოლიტიკურ და ეკონომიკურ მხარდაჭერას შავ ზღვაში, რაც ნიშნავს მილიარდობით შემოსულ ამერიკულ ინვესტიციას, ათასობით სამუშაო ადგილს, წინ წასულ ქართულ ოჯახებსა და ეკონომიკას, ასევე დაბრუნებულ ემიგრანტებს.
ჩვენი პარტნიორები დგანან საქართველოს გვერდით და ერთადერთი რაც მათ ამოძრავებთ, არის სურვილი, რომ საქართველო სწრაფად რეფორმირდეს, სწრაფად დაუახლოვდეს „ნატოს“, ევროკავშირს და გახდეს განვითარებულ ქვეყნებში ერთ-ერთი მოწინავე“, – განაცხადა სერგო ჩიხლაძემ.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
