პარტია ,,ქართული ოცნების” თავმჯდომარე, ირაკლი კობახიძე ჟურნალისტებთან კომენტარს აკეთებს ევროპული საბჭოს 12 რეკომენდაციის შესრულების პროცესზე და აცხადებს, რომ ყველა პირობა, რომლის შესრულებაც მმართველ გუნდს ეკისრება, ივნისის ბოლომდე მზად იქნება:
,,ჩვენ აქტიურად ვმუშაობთ 12 პუნქტიანი გეგმის შესრულებაზე. ივნისის ბოლომდე ყველა რეფორმის შესრულება დასრულდება. ქვეყანა თავიდან ბოლომდე იქნება მზად იმისათვის, რომ მიიღოს კანდიდატის სტატუსი. იმედი გვაქვს, რომ ამ შემთხვევაში, დეკემბერში, ის პოლიტიკური გადაწყვეტილება, რომელიც ევროპულმა საბჭომ უნდა მიიღოს, იქნება სამართლიანი.
შარშან, სამწუხაროდ, ევროპული საბჭოს მხრიდან ჩვენი საზოგადოებისთვის გულდასაწყვეტი გადაწყვეტილება იყო მიღებული. იმედი გვაქვს, რომ ამ შემთხვევაში, დეკემბერში სამართლიანი პოლიტიკური გადაწყვეტილება იქნება მიღებული”, – განაცხადა ირაკლი კობახიძემ.
ამასთან, მმართველი პარტიის ლიდერმა, რეკომენდაციების შესრულების მხრივ ერთ-ერთ კრიტიკულ ნაწილად პოლარიზაცია დაასახელა და პარტნიორი ქვეყნების ინფორმირებაზეც ისაუბრა:
“რა თქმა უნდა, პოლარიზაცია არის პრობლემური პუნქტი, პოლარიზაცია რეფორმებით ვერ დასრულდება, ამას ოპოზიციაში რადიკალიზმის შემცირება სჭირდება. სამწუხაროდ, ამ მიმართულებით ნაბიჯები არ იდგმება.
რაც შეეხება იმ პუნქტებს, რაზეც ჩვენ გვეკისრება პასუხისმგებლობა, ეს არის რეფორმები, ეს იყო თანამდებობის პირთა არჩევა, ჩვენ ყველა შესაბამისი პუნქტი სათანადოდ შევასრულეთ ან შევასრულებთ ივნისის ბოლომდე.
ბუნებრივია, ჩვენს პარტნიორებს მუდმივად ვუზიარებთ ინფორმაციას რეფორმების განხორციელების მიმდინარეობასთან დაკავშირებით.
შესაბამისად, ერთი – რეფორმების განხორციელების კუთხით ვართ პირნათელი; მეორე, ჩვენი პარტნიორების ინფორმირებაც, რა თქმა უნდა, არის უზრუნველყოფილი. ფართო ინფორმირება არის ჩვენი პასუხისმგებლობა და ამას ვაკეთებთ”, – აღნიშნა ირაკლი კობახიძემ.
