საქართველოს პრეზიდენტ სალომე ზურაბიშვილთან დაკავშირებით ,,ქართული ოცნების“ პოლიტიკური საბჭოს განცხადებაზე კომენტარს აკეთებს საქართველოს პარლამენტის წევრი, ,,სტრატეგია აღმაშენებლის“ გენერალური მდივანი პაატა მანჯგალაძე:
,,ქართული ოცნება“ მიზანმიმართულად იქცევა ასე. ეს არის ყურადღების გადატანის კამპანია, ცრუ ხმაურის კამპანია, რომ თითქოს ახლა რაღაც ხდება. ლაშა ხუციშვილი იქნება თუ არა ეროვნული ბანკის საბჭოში – ამით არაფერი არ შეიცვლება.
პირდაპირ გეუბნებით – ეს არის ცრუ ხმაური, რომ ყურადღება მიიპყროს და ჩვენ არ ვილაპარაკოთ იმ კატასტროფაზე, რაც ხდება ევროინტეგრაციის მიმართულებით, იმ მავნებლობებზე, რასაც ,,ქართული ოცნება“ რუსეთთან დაკავშირებით ჩადის.
სალომე ზურაბიშვილი ვიდრე კონკრეტულ ნაბიჯებს არ გადადგამს და ყველაფერს არ ასახავს ქმედებებში, ვგულისხმობ, მათ შორის, ნიკა გვარამიას გათავისუფლებას, მე ამ პროცესის მიმართ ნდობა არ მაქვს.
მე მგონია, რომ ეს არის ხმაური ყურადღების მისაქცევად“, – განაცხადა პაატა მანჯგალაძემ.
ავტორი
ნინი ხიჯაკაძე
