პარტია “ევროპული დემოკრატების” გენერალური მდივანი, მამუკა გამყრელიძე, სოციალურ ქსელში გამოქვეყნებულ პოსტში მძიმე ნეგატიურ პროგნოზს აკეთებს, თუკი დასავლეთი ზურგს სეაქცევს საქართველოს:
“ისეთი შთაბეჭდილება მრჩება, რომ ქვეყნის მოსახლეობის უდიდესი ნაწილი ვერ ხვდება რა საფრთხის წინაშე დაგვაყენა ქოცხელისუფლებამ.
ძალიან მოკლედ ავხსნი.
საკმარისია დასავლეთმა ჩვენზე ხელი ჩაიქნიოს, რომ მყისიერად აღმოვჩნდებით დემოკრატიებიდან ავტოკრატული რეჟიმების სიაში. იქ დაიხურება ევროკავშირში უვიზო მიმოსვლა და დამთავრდება მასთან თავისუფალი ვაჭრობის შეთანხმება. მინიმუმამდე დავა ფინანსური დახმარება დასავლეთიდან. შეწყდება ინფრასტრუქტურული პროექტების დაფინანსება. აღარ დაფინანსდება სტუდენტების უცხოეთში სწავლება და კვალიფიკაციის ამაღლება. შემცირდება გრანტების რაოდენობა. დასავლეთის საბანკო სისტემა მცირე ღრიჭოს დაგვიტოვებს, ან შეიძლება სულაც ცხვირწინ მოგვიხუროს კარი. აღარაფერს ვამბობ უსაფრთხოებაზე და თავდაცვის სისტემაში ინტეგრირებაზე. დავრჩებით გატეხილ ვარცლთან.
ჩვენ არ ვართ რუსეთი, რომელსაც ჯერ კიდევ დარჩა შიდა რესურსი, სავალუტო და ოქროს რეზერვები. ჩვენ არ ვართ აზერბაიჯანი, რომელსაც უზარმაზარი ენერგეტიკული რესურსი აქვს და გვერდში თურქეთი უდგას. ჩვენ არ ვართ სომხეთი, რომელსაც მდიდარი დიასპორა არჩენს და დღეს ჩვენზე წინ აღმოჩნდნენ დასავლეთთან ურთიერთობის კუთხით.
რით აპირებს ამ ქვეყნის მოსახლეობა ფონს გასვლას? ნუთუ 90-იანებში ჩავრჩით და ვეღარ მივხვდით, რომ ჭიანი ვაშლით და მჟავე მანდარინით ქვეყანას ვერ გააძღებ? ვერც ტურიზმი და კინტაური გვიშველის. განვითარებულ ქვეყნებში ტურისტული ბიზნესი მხოლოდ სასიამოვნო დამატებაა ინდუსტრიით და ტექნოლოგიებით მიღებულ შემოსავალზე. ჩვენ დავრჩებით ერთ პატარა, განუვითარებელ ქვეყნად, სრულიად უსახსროდ და დაუცველები ბოროტი ვეშაპის წინ, რომლისთვისაც ჩვენ მხოლოდ დუქნის ფუნქციას ვასრულებთ.
ნუთუ ეს არის ამ მოსახლეობის ამბიცია? მსოფლიოსაგან გარიყული და მიუღებელი ქვეყნის მედუქნეობა?“, – წერს ფეისბუქის პირად გვერდზე მამუკა გამყრელიძე.
