პარტია ,,ქართული ოცნების“ თავმჯდომარე, ირაკლი კობახიძე ჟურნალისტებთან კომენტარს აკეთებს საქართველოში შემოსულ, რუსეთის საგარეო უწყების ხელმძღვანელის შვილსა და იმ პირებთან დაკავშირებით, რომლებიც დასავლეთის მხრიდან არიან სანქცირებული. მმართველი პარტიის ლიდერი აცხადებს, რომ საქართველო არ უერთდება დაწესებულ სანქციებს და კონკრეტულ პირებს მხოლოდ მაშინ შეეზღუდებოდათ საქართველოში შემოსვლა თუ მათ დარღვეული ექნებოდათ ოკუპაციის შესახებ კანონი:
,,პირველ რიგში უნდა ითქვას თუ რა კრიტერიუმებით ხელმძღვანელობს სახელმწიფო ქვეყანაში კონკრეტული ადამიანების შემოსვლის დროს – როგორც მოგეხსენებათ, საქართველო არ არის მიერთებული სანქციებს, ჩვენ არ გვაქვს დაწესებული სანქციები რუსეთის ფედერაციისთვის, არსებობს კანონი ოკუპაციის შესახებ, მთავარი კრიტერიუმი არის, რა თქმა უნდა, ოკუპაციის შესახებ კანონის დარღვევა-არდარღვევა.
ამ შემთხვევაში, თუ არ იყო დარღვეული ოკუპაციის შესახებ კანონი, რა თქმა უნდა, საბაჟო სამსახურს არ ჰქონდა საფუძველი იმისათვის, რომ კონკრეტული პირები არ შემოეშვა საქართველოში.
პერსონალურ სანქციებთან დაკავშირებით კი მინდა განვმარტო: ჩვენ არ ვუერთდებით სანქციებს, ჩვენ არ ვუწესებთ სანქციებს რუსეთის ფედერაციას, მათ შორის, იგულისხმება პერსონალური სანქციების დაწესება. ამასთან, არ შეიძლება სანქცია ეხებოდეს ოჯახის წევრს. მე ვარ ადამიანის უფლებების სპეციალისტი. თავის დროზე გერმანიაში მაქვს ნასწავლი ეს სფერო. პირდაპირ, თამამად შემიძლია გითხრათ, რომ ოჯახის წევრის სანქცირება უხეშად ეწინააღმდეგება ადამიანის უფლებების სტანდარტებს.
კონკრეტული ადამიანები საქართველოს მიერ არ არიან სანქცირებულები. ჩვენ, როდესაც არ ვუერთდებით სანქციებს, მათ შორის, ეს გულისხმობს პერსონალურ სანქციებსაც. ჩვენ გვაქვს ერთადერთი სანქცია ქვეყანაში შემოშვების კუთხით. ეს უკავშირდება ოკუპაციის შესახებ კანონს.
ისინი სანქცირებულები შეიძლება არიან, მაგრამ საქართველოს მათთვის სანქციები არ დაუწესებია.
ჩვენ არ ვუერთდებით ამ სანქციებს. ეს არის ჩვენი მკაფიო პოზიცია“, – განაცხადა ირაკლი კობახიძემ.
ავტორი
ნინი ხიჯაკაძე
