“თუკი ადამიანს სამედიცინო დახმარება ესაჭიროება, ის ამ დახმარებას კერძო კლინიკაში, “ვივამედში” იღებს” – რატი ბრეგაძე მიხეილ სააკაშვილზე

იუსტიციის სამინისტროში შეხვედრა შედგა საქართველოში აკრედიტებულ ევროკავშირის ქვეყნების ელჩებსა და ელჩების მოადგილეებთან. შეხვედრის შემდეგ იუსტიციის მინისტრმა, რატი ბრეგაძემ ჟუნალისტებთან კომენტარი გააკეთა საქართველოს მე-3 პრეზიდენტის საქმეზე. მისი განცხადებით, სტრასბურგის სასამართლოს გადაწყვეტილება, რომ დაუყოვნებლივ მოხდეს მიხეილ სააკაშვილის სამკურნალოდ საზღვარგარეთ გადაყვანა, უარის განაცხადი არის საბოლოო პასუხი, ხოლო საქართველოში იგი სათანადო მკურნალობას ირებს:

,,შეხვედრა შეეხებოდა, აქ არაფერია დასამალი, მსჯავრდებულ სააკაშვილთან დაკავშირებულ სიტუაციას. ბუნებრივია, ვისაუბრეთ, მათ შორის, სტრასბურგის სასამართლოს გადაწყვეტილებაზეც, ასევე, მიმოვიხილეთ სხვადასხვა საკითხებიც, რომელზეც გასაგები მიზეზების გამო საჯაროდ მოვერიდები საუბარს.

ჩვენ ვხელმძღვანელობთ ადამიანის უფლებების მხოლოდ და მხოლოდ უმაღლესი სტანდარტებით. თუკი ადამიანს სამედიცინო დახმარება ესაჭიროება, ის ამ დახმარებას კერძო კლინიკაში, ,,ვივამედში“ იღებს. ექიმების შესაბამისი დასკვნა როდესაც იქნება, რომ შესაძლებელია უკვე ამ ადამიანის გადაყვანა და ის არის სრულიად განკურნებული, ბუნებრივია, მიღებული იქნება შესაბამისი გადაწყვეტილება.

კონკრეტულ მოთხოვნაზე, რომ მსჯავრდებული სააკაშვილი დაუყოვნებლივ სამკურნალოდ ყოფილიყო გადაყვანილი ვარშავაში, ამაზე იყო პასუხი. ეს არის საბოლოო გადაწყვეტილება ამ საკითხზე.

დანარჩენ სარჩელს რაც შეეხება – როდესაც დაცვის მხარე სარჩელს წარადგენს, სასამართლო გამოგვიგზავნის ჩვენ უკვე, ასე ვთქვათ, პოზიციების მისაწოდებლად, მერე ვისაუბრებთ ამ საკითხზე.

რაც შეეხება გადაწყვეტილებას – პოლონეთში მსჯავრდებული სააკაშვილის სამკურნალოდ გადაყვანაზე, ეს გადაწყვეტილება ნამდვილად არის საბოლოო“, – განაცხადა რატი ბრეგაძემ.

ავტორი
ნინი ხიჯაკაძე