საქართველოს პრემიერ-მინისტრი, ირაკლი ღარიბაშვილი უნგრეთში კონსერვატიული პოლიტიკური მოქმედების ყოველწლიურ კონფერენციაში (CPAC) იღებდა მონაწილეობას, სადაც სიტყვით გამოსვლის დროს ისაუბრა ოჯახური ღირებულებებზე, უმცირესობებისა და უმრავლესობის უფლებები. ირაკლი ღარიბაშვილი ჟურნალისტებთან გაკეთებულ კომენტარში განმარტავს, რომ დღეს, ქვეყანაში ყველა ადამიანის თავისუფალი ნება დაცულია კონსტიტუციით:
,,მინდა გითხრათ, მე არასოდეს არ მითქვამს, რომ მხოლოდ უმრავლესობის პრემიერ-მინისტრი ვარ. მე ვარ ჩვენი ქვეყნის პრემიერ-მინისტრი! მე ვთქვი ძალიან მარტივი ჭეშმარიტება, რომ ჩვენ არ დავუშვებთ არც უმცირესობაზე ძალადობას, ასევე არ დავუშვებთ უმცირესობის ძალადობას და მათ აგრესიულ პროპაგანდას ჩვენი მოსახლეობის, ხალხის უმრავლესობაზე.
ჩვენს ქვეყანაში ყველა ადამიანი არის თუ არა თანასწორი? [ჟურნალისტის შეკითხვა]
რა თქმა უნდა, ეს უფლებები არის გარანტირებული კონსტიტუციით. უფრო მეტიც, ჩვენ ეს ყველაფერი კანონით გავამყარეთ და ამ ქვეყანაში არცერთი ადამიანის დისკრიმინაცია არ ხდება.
მე ვთქვი მთავარი – ჩვენი ქვეყნის აბსოლუტური უმრავლესობა, ეს არის დაახლოებით 90%, იმ კონსერვატიულ შეხედულებებს, ოჯახურ ფასეულობებს, ღირებულებებს იზიარებს, რომლითაც ჩვენ, ყველანი, დღემდე მოვედით. ეს არის ქრისტიანული ფასეულობები! ეს არის ეროვნული, პატრიოტული, ოჯახური ღირებულებები! მე ამაზე მაქვს საუბარი.
მე გისვამთ კითხვას – ის აღვირახსნილი პროპაგანდა, რომელიც ზოგიერთ ქვეყნებში მიმდინარეობს თქვენთვის მისაღებია?! იგივე სქესის გადაკეთებასთან დაკავშირებით…
ეს არის პროპაგანდა, რომელიც არის მომწამვლელი, ბავშვებში, ბაღებში, სკოლებში… უნივერსიტეტებში – აღარ ვსაუბრობ“, – განაცხადა ირაკლი ღარიბაშვილმა.
ავტორი
ნინი ხიჯაკაძე
