,,სტრატეგია აღმაშენებლის” პოლიტიკური საბჭოს წევრი, განათლების მიმართულების ხელმძღვანელი, ნანა ტოხვაძე მწვავე შეფასებას აკეთებს საქართველოს პრემიერ-მინისტრის, ირაკლი ღარიბაშვილის მიერ ტელეკომპანია ,,იმედის” გადაცემაში “იმედის კვირა”, ახალგაზრდებთან დაკავშირებით დაფიქსირებულ მოსაზრებებზე:
,,რეპრესიების მორიგი სამიზნე განათლების სფეროა. საკუთარ ხალხთან პოლიტიკურად, მორალურად და რაციონალურად დამარცხებული პრემიერი აფრქვევდა სიძულვილს, ყველაფერი განსხვავებულისა და თავისუფალის მიმართ.
ირაკლი ღარიბაშვილი ზიზღის ენით იხსენიებდა ახალგაზრდებს, რომელთა არჩევანი თავისუფლება და ევროპაა! ეს საუკუნოვანი არჩევანი რევიზიას არ ექვემდებარება და ამას საამაყო ქართველი ხალხი არ დაუშვებს!
პრემიერად წოდებულმა არაფორმალური განათლების ცენტრები, სასწავლო დაწესებულებები და აკადემიური სფერო მტრად შერაცხა ევროპული მომავლის დაცვისთვის! კარგად დაფიქრდეს “მთავრობის მეთაური” როცა ყველაზე ჯანსაღ, პროგრესულ და მებრძოლ ხალხს უპირისპირდება.
ცუდად მთავრდება ხოლმე “ტვინის გამორეცხვის” ბრალდება ხალხზე, რომლებმაც ქვეყნის უალტერნატივო დასავლური კურსი გაავრცელეს და შეინარჩუნეს“, – განაცხადა ნანა ტოხვაძემ.
ინფორმაციისთვის: ინტერვიუში მთავრობის მეთაური აცხადებს, რომ ახალგაზრდები, რომლებიც სცენაზე იდგნენ, დაკავშირებული იყვნენ ნაცმოძრაობასთან ან მათ სატელიტურ ორგანიზაციებთან, მიდის ახალგაზრდების მოწამვლა და მათი ტვინის გამორეცხვა.
ავტორი
ნინი ხიჯაკაძე
