“მთავარი საკითხი – ეს არის აქციებზე დაკავებული ადამიანების დაუყოვნებლივ გამოშვება” – სერგო ჩიხლაძე

,,სტრატეგია აღმაშენებლის“ პოლიტიკური საბჭოს წევრი სერგო ჩიხლაძე კომენტარს აკეთებს ,,ქართული ოცნებისა“ და ,,ხალხის ძალის“ ერთობლივ განცხადებაზე, სადაც საუბარია, რომ ,,უცხოური აგენტების შესახებ“ კანონი გაწვეულია. ოპოზიციონერი ლიდერი აღნიშნავს, რომ პროტესტი უნდა გაგრძელდეს, რადგან ხელისუფლების მხრიდან შეცვლილი გადაწყვეტილებები, უნდობლობას იწვევს:

,,მოქალაქეების, განსაკუთრებით ახალგაზრდების ერთსულოვნებას, შემართებას შედეგი ყოველთვის მოაქვს. რა თქმა უნდა, ეს არის ,,ქართული ოცნების“, რუსული რეჟიმის მხრიდან უკან დახევა.

რა თქმა უნდა, ასევე, რჩება უნდობლობა. იმიტომ, რომ ჩვენ არაერთხელ ვნახეთ შეთანხმებები, რომლებზეც ხელს აწერს ,,ქართული ოცნება“. გავიხსენოთ – 8 მარტის შეთახმება, ვნახეთ 19 აპრილის შეთანხმება, რომელიც შემდეგ გადახია ,,ქართულმა ოცნებამ“.

პროტესტი უნდა გაგრძელდეს პარლამენტშიც და ყველგან, სადაც პროტესტის სივრცე არსებობს!

არ დაგვავიწყდეს კანონი ერთია, მაგრამ კიდევ ერთი მთავარი საკითხი – ეს არის აქციებზე დაკავებული ადამიანების დაუყოვნებლივ გამოშვება“, – განაცხადა სერგო ჩიხლაძემ.

ავტორი
ნინი ხიჯაკაძე