,,ლელო საქართველოსთვის“ თავმჯდომარე მამუკა ხაზარაძე პარტიის ოფისში გამართულ საგანგებო ბრიფინგზე კომენტარს აკეთებს ,,ქართული ოცნების“ მიერ ,,უცხოური გავლენის აგენტების რეესტრის“ კანონპროექტის გაწვევაზე. ოპოზიციონერი ლიდერი, ასევე საუბრობს პარტიის სამოქმედო გეგმაზე მიმდინარე პროცესებთან დაკავშირებით:
,,ქართულმა ოცნებამ“ განაცხადა, რომ ისინი გაიწვევენ კანონს. ეს, რა თქმა უნდა, არის გამარჯვება, მაგრამ ჩვენ მმართველი პარტიის არ გვჯერა! მე მგონი, საზოგადოებამ ძალიან კარგად იცის და უახლოესი ისტორიის განმავლობაში ბევრჯერ დავინახეთ, თუ როგორ მოატყუა ,,ქართულმა ოცნებამ“ ჩვენი საზოგადოება.
აქედან გამომდინარე, ეს ბრძოლა, წინააღმდეგობა გაგრძელდება ყველა ფრონტზე, სანამ ჩვენ არ დავინახავთ კონკრეტულად, იურიდიულად გაფორმებულ დოკუმენტს კანონის გამოწვევასთან დაკავშირებით. ჩვენი საპარლამენტო დეპუტაცია გააკეთებს ყველაფერს იმისთვის, რომ საკანონმდებლო დონეზე ეს პროცესი მივიდეს ბოლომდე.
,,ლელო“ აგრძელებს რეგიონებში სიარულს და ხალხთან დისკუსიას, მოსახლეობისთვის ახსნა-განმარტებას, რომ ჩვენ საქმე რუსულ კანონთან კი არ გვაქვს, არამედ რუსულ ხელისუფლებასთან. ეს ნათლად ითქვა, ნათლად ჩამოიხსნეს ნიღაბი!
ჩვენ გავაგრძელებთ სოფელ-სოფელ სიარულს, რომ ადამიანებს ავუხსნათ, თუ რა საშიშროებასთან გვაქვს საქმე! თუ როგორ უნდა ბიძინა ივანიშვილის ხელისუფლებას, შეცვალოს ჩვენი ქვეყნის ისტორიული კურსი. – ამას არ დავუშვებთ!“ – განაცხადა მამუკა ხაზარაძემ.
ავტორი
ნინი ხიჯაკაძე
