“ძალიან ვწუხვარ, რომ სამაშველო ოპერაციები ნელა მიმდინარეობს და არ შეგვიძლია ყველა ადამიანის უფრო სწრაფად გადარჩენა” – რეჯეფ თაიფ ერდოღანი

თურქეთში მომხდარი მიწისძვრის შედეგად დაღუპულია 24 ათასი ადამიანი და მსხვერპლის რაოდენობა იზრდება. ქალაქების ნანგრევებისგან გაწმენდა და დაშავებულთა სამძებრო სამუშაოები კვლავ მიმდინარეობს. სტიქიის ზონაში იმყოფებოდა პრეზიდენტი რეჯეფ თაიფ ერდოღანი, რომელმაც საგანგებო ბრიფინგზე ქვეყანაში არსებული ვითარება შეაფასა:

,,იმის მიუხედავად, რომ ჩვენ შევძელით სავარაუდოდ უმსხვილესი სამძებრო-სამაშველო რაზმის მობილიზება, რომლის შემადგენლობაში 141 ათასზე მეტი წევრია, სამწუხაროდ, ფაქტია, რომ ჩვენ ვერ შევძელით ისე სწრაფად რეაგირება, როგორც ვიმედოვნებდით.

ძალიან ვწუხვარ, რომ სამაშველო ოპერაციები ნელა მიმდინარეობს და არ შეგვიძლია ყველა ადამიანის უფრო სწრაფად გადარჩენა.

ყველა მუნიციპალიტეტში უამრავი ადამიანი მუშაობს. თურქეთის ყველა მოქალაქე და ჩვენი მეგობრები, მთელი მსოფლიოდან, ვდგავართ დაზარებულთა გვერდით“, – განაცხადა რეჯეფ თაიფ ერდოღანმა.

ავტორი
ნინი ხიჯაკაძე