“ნაციონალურ მოძრაობაში” თავმჯდომარის თანამდებობისთვის ბრძოლა გადამწყვეტ ფაზაში შედის. სოციალურ ქსელში ქვეყნის მე-3 პრეზიდენტის მიხეილ სააკაშვილის ძმის, დავით სააკაშვილის პოსტი გავრცელდა იმასთან დაკავშირებით, რომ თავმჯდომარეობის ერთ-ერთი კანდიდატი, გიორგი მუმლაძე, მას პარტიის გენერალური მდივნის თანამდებობას სთავაზობს არჩევნებში გამარჯვების შემთხვევაში:
“გიორგი მუმლაძისგან მივიღე შეთავაზება გამარჯვების შემთხვევაში “ნაციონალური მოძრაობის” გენერალური მდივნის პოსტის დაკავების შესახებ.
დასამალი არ არის, რომ მიშას გათავისუფლებისთვის სხვადასხვა აქტივობებში მჭიდროდ ვთანამშრომლობ გიორგისთან, მის მეგობრებთან და თანამოაზრეებთან, რადგან მათი თავგანწირული და გულწრფელი ბრძოლა ჩემი აზრით, რეალურ შედეგზეა ორიენტირებულია.
ახლა ჩემი და ჩემი ოჯახის ფიქრები და განწყობები დაკავშირებულია მიშას ჯანმრთელობისა და სიცოცხლის გადარჩენასთან. შესაბამისად, მთლიანად ვართ კონცენტრირებული ჩვენი ოჯახისა და საზოგადოების დიდი ნაწილის ამ ეგზისტენციალურ პრობლემაზე.
მინდა მთელი გულით წარმატებები ვუსურვო ყველა კანდიდატს, ჩემი ხმა გიორგის.
შემოთავაზებას რაც შეეხება კონკრეტული გადაწყვეტილება ჯერ არ მიმიღია, არაა მარტივი და დრო მჭირდება.
აუცილებლად ჩავთვალე ამის შესახებ თქვენთვის მემცნო“, – წერს ფეისბუქის საკუთარ გვერდზე დავით სააკაშვილი.