ვიცე-პრემიერი, კულტურის, სპორტისა და ახალგაზრდობის მინისტრი თეა წულუკიანი მწვავე შეფასებას აკეთებს პოლონეთის სეიმის მიერ მიღებულ რეზოლუციაზე მიხეილ სააკაშვილთან დაკავშირებით და აცხადებს, რომ რეზულუციის ავტორი არის შინაგან საქმეთა ყოფილი მინისტრის, ვანო მერაბიშვილის უახლოესი მეგობარი, პოლონეთის სეიმის ვიცე-სპიკერი მალგოჟატა გოშევსკა:
,,უნდა ჩაითვალოს, რომ არის არამეგობრული ჟესტი. თუმცა, ამ ჟესტს აქვს ძალიან მარტივი ახსნა. გასაგები ხდება ყველაფერი, როდესაც ვხედავთ, რომ ამ არამეგობრული ჟესტის შესაბამისი რეზოლუციის უკან დგას მისი ავტორი, ბატონო ვანო მერაბიშვილის უახლოესი მეგობარი, ქალბატონი გოშევსკა. ამით ყველაფერი არის უკვე ახსნილი.
ჩვენ საზოგადოებას კი ახსნა და განმარტება არ სჭირდება, ვინ არის ვანო მერაბიშვილი. თუ პოლონურ საზოგადოებას აქვს ამისი საჭიროება, რომ ავხსნათ ვინ არის ვანო მერაბიშვილი? – ესეც შეგვიძლია, რომ ფაქტებით ავხსნათ – რა კალიბრის კრიმინალთან გვაქვს საქმე და რისთვის იხდიდა ის სასჯელებს“, – განაცხადა თეა წულუკიანმა.
ინფორმაციისთვის: პოლონეთის სეიმმა 13 იანვარს მიიღო რეზოლუცია, სადაც საუბარია საქართველოს მე-3 პრეზიდენტისთვის სათანდო სტანდარტებზე დაფუძნებული მკურნალობის კურსის მიღებაზე:
„საქართველოს ყოფილი პრეზიდენტის, მიხეილ სააკაშვილის დრამატული მდგომარეობის შესახებ შემაშფოთებელი ინფორმაციის, მათ შორის, სამედიცინო დიაგნოზების გამო, რომლებიც ადასტურებს მისი ჯანმრთელობის მდგომარეობის სწრაფად გაუარესებას, პოლონეთის რესპუბლიკის სეიმი მიმართავს საქართველოს ხელისუფლებას, დაიცვას ჰუმანიტარიზმის უნივერსალური პრინციპები, რომელთა მიხედვითაც ადამიანის სიცოცხლე და ჯანმრთელობა უმაღლესი ღირებულებაა”, – წერია რეზოლუციაში.
ავტორი
ნინი ხიჯაკაძე
