სპეციალური პენიტენციური სამსახურის მიერ გავრცელებულ განცხადებას მწვავე შეფასებებით, პრეტენზიებითა და კონკრეტული მოთხოვნებით მიმართავს ცენტრ “ემპათიას” ხელმძღვანელი, მარიამ ჯიშკარიანი:
“20/12/2022-ში სპეციალური პენიტენციური სამსახურის მიერ გავრცელებული განცხადება არის უბადრუკი მცდელობა დააშინოს და ზეგავლენა მოახდინოს დამოუკიდებელ ექსპერტებსა და თავისუფალ მედიაზე.
მოვუწოდებთ სპეციალური საგამოძიებო სამსახურის ეფექტურად აწარმოოს მიხეილ სააკაშვილის მიმართ არასათანადო მოპყრობის ფაქტზე გამოძიება და საერთაშორისო სტანდარტების შესაბამისად, მოითხოვოს პატიმრისადმი მტრულად განწყობილი, პენიტენციური სამსახურის მაღალჩინოსნებისა და იუსტიციის მინისტრის თანამდებობიდან გადაყენება გამოძიების დამთავრებამდე.
სპეციალურ პენიტენციურ სამსახურს კი კიდევ ერთხელ მოვუწოდებთ, დაბრუნდეს საქართველოს კანონმდებლობისა და კონსტიტუციის ჩარჩოში და თავი დაანებოს საზოგადოების დეზინფორმირებასა და ცენტრ “ემპათია”-ზე თავდასხმას. ამ უწყებას, როგორც პროცესის მონაწილე მხარეს, ვაცნობებთ, რომ ცენტრი “ემპათია” და მისი ექსპერტები არიან დამოუკიდებელი პროფესიული საქმიანობის სუბიექტები და თავის განცხადებებსა თუ საექსპერტო დასკვნებს ვერ შეუთანხმებენ პროცესის მხარეს. ცენტრი “ემპათია” -ს ექსპერტთა ჯგუფი მოქმედებს საქართველოს კანონმდებლობისა და საერთაშორისო სამედიცინო ეთიკის ვალდებულებების ჩარჩოში.
მოვუწოდებ, პენიტენციურ სამსახურს, კარგად შეისწავლოს პატიმრისა და პაციენტის უფლებების შესახებ საქართველოს საერთაშორისო ვალდებულებები, ქართული კანონმდებლობა და ციხეთა ჯანდაცვისა თუ საერთაშორისო სამედიცინო ეთიკის სტანდარტები.
აღნიშნული ქვეუწყების დაქვემდებარებაში ან კავშირში მყოფ სამედიცინო პერსონალს კი მოვუწოდებთ იმოქმედონ პროფესიული დამოუკიდებლობის და მიუკერძოებლობის პრინციპების შესაბამისად, განაცხადონ, ყველა არაადამიანური მოპყრობის ფაქტის შესახებ, თუკი ასეთს ისინი შეესწრნენ ან/და მათთვის ცნობილი გახდა“, – წერს ფეისბუქის პირად გვერდზე მარიამ ჯიშკარიანი.
