ჰააგის სასამართლომ გადაწყვეტილება მიიღო. პროკურორის ოფისმა რუსეთ-საქართველოს საქმეზე გამოძიება დაასრულა და საბოლოო გადაწყვეტილებით ფაქტობრივად განაცხადა, რომ საქართველოს დანაშაული არ ჩაუდენია, ხოლო კონკრეტული დამნაშავე პირების მიმართ პროცესი გაგრძელდება. აღნიშნულ საკითხზე საგანგებო ბრიფინგზე ხელისუფლებას კონკრეტული კითხვებით მიმართავს ,,სტრატეგია აღმაშენებლის“ თავმჯდომარე გიორგი ვაშაძე:
,,გვინდა საზოგადოების ყურადღება მივაპყროთ უპრეცედენტო გადაწყვეტილებაზე, რომელიც ჰააგის სასამართლოს პროკურორმა მიიღო რუსეთთან მიმართებაში, 2008 წლის ომთან დაკავშირებით. მწუხარებით უნდა აღვნიშნოთ, რომ ხელისუფლება, პრემიერ-მინისტრი საერთოდ განცხადებასაც კი არ აკეთებს ამ საკითხთან დაკავშირებით, პრორუსული “ქართული ოცნების” ხელმძღვანელი კობახიძე, არაფერს ამბობს. რატომ? – იმიტომ, რომ 10 წლის მანძილზე ეს ხალხი გვიმტკიცებდა, რომ ომი საქართველომ დაიწყო. 10 წლის მანძილზე, ეს ადამიანები ჩვენ გვადანაშაულებდნენ 2008 წლის საომარ მოქმედებებში, მაგრამ მნიშვნელოვანი არის რა? – რა თქვა პროკურორმა:
– პირველი, რომ საქართველოს არანაირი ბრალი არ მიუძღვის, იოტისოდენა მტკიცებულებაც კი არ არის საქართველოს დანაშაულებრივი ქმედების შესახებ, ბრალიც კი არ იქნა წარდგენილი ქართულ მხარესთან მიმართებაში;
– მეორე, ის ფრაზები – ,,მძინარე ცხინვალს დაესხა თავს საქართველო“, ან ,,სამშვიდობოების დაბობმბვა დაიწყო ქართულმა მხარემ“ – ყველაფერი ეს გაქარწყლდა! ცალსახად და მკაფიოდ – დღეს, მხოლოდ და მხოლოდ, რუსეთის ბრალეულობაა დადგენილი!
შესაბამისად, რა უნდა ხდებოდეს ამის შემდგომ:
– პირველი, გვაინტერესებს, აღძრა თუ არა იგივე ტიპის სისხლის სამართლის საქმე ქართულმა სამართალდამცავმა ორგანოებმა, იმ სამ ადამიანთან მიმართებაში, რომელიც ჰააგის პროკურორის მიერ არის დასახელებული, როგორც ბრალდებულები საქართველოს წინააღმდეგ განხორციელებულ საომარ მოქმედებებში?
მეორე – არის თუ არა რაიმე კონკრეტული სამოქმედო გეგმა საერთაშორისო ასპარეზზე? იმიტომ, რომ მთლიანად იცვლება სამართლებრივი საფუძვლები, საქართველოს უჩნდება უფლება მოითხოვოს რეპარაცია, ანუ ზიანის ანაზღაურება იმ დევნილებისთვის, რომლებმაც უშუალოდ ზიანი მიიღეს 2008 წლის ომის დროს, არა მხოლოდ იმ სიცოხლეების საფასურად, რომელიც შეეწირა რუსულს აგრესიას საქართველოში“, – განაცხად გიორგი ვაშაძემ.
ავტორი
ნინი ხიჯაკაძე
