“სტრატეგია აღმაშენებლის” ლიდერებმა შეხვედრა alde-ს ვიცე პრეზიდენტთან, უკრაინის რადას დეპუტატთან პარტია “გოლოსის” თავმჯდომარესთან კირა რუდიკთან გამართეს. შეხვედრის მთავარი თემა რუსეთ-უკრაინის ომი და ტყვედ ჩავარდნილი ქართველი სამხედროს საკითხი იყო:
“კონკრეტული საკითხი რაზეც ვისაუბრეთ პირველი ეს არის, რომ ჩვენი თანამემამულები, რომლებიც არიან ტყვედ რუსეთის მხარეს და ქალბატონმა კირამ სრული მხარდაჭერა აღგვითქვა, რომ დაგვეხმარება ამ ტყვეების განთავისუფლებაში და მოლაპრაკებების პროცესში.
მეორე მნიშვნელოვანი საკითხი: ქალბატონი კირა უშუალოდ მუშაობს რეპარაციის საკითხებზე, ეს არის რუსული აქტივების დაყადაღება მსოფლიო მასშტაბით და ამ აქტივების მიმართვა რუსეთის მხრიდან ზიანის ანაზღაურებაზე.
გარდა ამისა რა თქმა უნდა ვისაუბრეთ საქართველოს ევროკავშირში ინტეგრაციის საკითხებზე და იმ თანადგომაზე, რაც ქართველი ხალხისგან ჩანს და სამწუხაროდ ნაკლებად ჩანს საქართველოს ხელისუფლებისგან – გენერატორებზეც კი ჭიდაობა გვიწევს, რომ ელემენტარულად გაიგზავნოს უკრაინაში. ვფიქრობ ჩვენ საბოლოო ჯამში საერთო დიდ გამარჯვებას აუცილებლად მოვიპოვებთ უკრაინის ფრონტზე, ამაში დარწმუნებული ვარ და ეს იქნება გამარჯვება საქართველოსთვისაც”, – აცხადებს გიორგი ვაშაძე.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს
