თბილისის საქალაქო სასამართლოში დასრულდა ცნობილი ჩოგბურთელის ნიკოლოზ ბასილაშვილის სასამართლო პროცესი. მოსამართლე ხათუნა ხარჩილავამ საქართველოს პირველი ჩოგანი გაამართლა ყოფილ ცოლზე, ნელი დოროყაშვილზე ძალადობის ბრალდების ყველა ეპიზოდში:
„სასამართლოს გადაწყვეტილება გახლავთ შემდეგი:
ნიკოლოზ ბასილაშვილი ცნობილი იქნეს უდანაშაულოდ და გამართლდეს საქართველოს სისხლის სამართლის კოდექსის 126-ე პრიმა მუხლის პირველი ნაწილით – სისტემატური სიტყვიერი შეურაცხყოფის ეპიზოდში;
საქართველოს სისხლის სამართლის კოდექსის 126-ე მუხლის პირველი ნაწილით – მხედველობაშია 2019 წლის 28 აგვისტოს ეპიზოდი;
საქართველოს სისხლის სამართლის კოდექსის 126-ე მუხლის პირველი ნაწილით – საუბარია 2019 წლის 1 აპრილის ეპიზოდზე;
საქართველოს სისხლის სამართლის კოდექსის 126-ე მუხლის პირველი ნაწილით – იგულისხმება 2019 წლის 30 აპრილის ეპიზოდი;
საქართველოს სისხლის სამართლის კოდექსის 126-ე მუხლის მეორე ნაწილის “ბ” ქვეპუნქტით – მხედველობაშია 2020 წლის 21 მაისის ეპიზოდი;
გაუქმდეს თბილისის საქალაქო სასამართლოს 2020 წლის 24 მაისის განჩინება, ნიკოლოზ ბასილაშვილის მიმართ აღკვეთის ღონისძიების სახით გამოყენებული გირაო. გირაოს შემტანს, განაჩენის აღსრულებიდან, ერთი თვის ვადაში სრულად დაუბრუნდეს გირაოს სახით შეტანილი შეტანილი ფულადი თანხა.
ნიკოლოზ ბასილაშვილს უფლება აქვს, აუნაზღაურდეს მიყენებული ზიანი.
განაჩენი კანონიერ ძალაში შედის გამოცხადებისთანავე. განაჩენი შეგიძლიათ გაასაჩივროთ დღეიდან ერთი თვის ვადაში, სააპელაციო სასამართლოში“, – განაცხადა ხათუნა ხარჩილავამ.
