“უკრაინაში მიმდინარეობს არაერთი საგამოძიებო საქმე, სადაც მიხეილ სააკაშვილი არის დაზარალებული, მათ შორის, მისდამი არაადამიანური მოპყრობის საქმე” – შოთა თუთბერიძე

საქართველოს მე-3 პრეზიდენტის, მიხეილ სააკაშვილის საქმეს უკრაინის სასამართლო განიხილავს, უკრაინის მოქალაქის მიმართ საქართველოს პენიტენციურ დაწესებულებაში განხორციელებული ზეწოლის ფაქტზე აღძრული საქმის ფარგლებში. დღეს პირველი სასამართლო სხდომა არის დანიშნული. აღნიშნულ საკითხზე ჟურნალისტებთან კომენტარს აკეთებს ადვოკატი შოთა თუთბერიძე:

,,როგორც ვიცით, უკრაინაში მიმდინარეობს რამდენიმე საქმე – არაერთი საქმე, სადაც მიხეილ სააკაშვილი არის დაზარალებული. მათ შორის ერთ-ერთი არის მისდამი არაადამიანური მოპყრობის საქმე, სადაც ქართველი პირების და უფრო მეტიც – ქართველი მაღალჩინოსნები ფიგურირებენ.

ბუნებრივია, ამ საქმეებზე მიხეილ სააკაშვილის მიერ ინფორმაციის მიწოდება სასამართლოსთვის არის სასიცოცხლოდ მნიშვნელოვანი და ამ საქმის განსახილველად.

ამასთან, რომ უკრაინის პროკურატურა ითხოვს მიხეილ სააკაშვილის დაკითხვას ამ საქმეებზე და მისგან ინფორმაციის მიწოდებას.

მე არ მგონია, რომ საქართველოს ხელისუფლების ინტერესებში ამჟამად შედის მიხეილ სააკაშვილისთვის ამის საშუალების მიცემა. შესაბამისად, არ ვფიქრობ, რომ ამის შესაძლებლობას პენიტენციური სამსახური მოგვცემს“, – განაცხადა შოთა თუთბერიძემ.

ავტორი
ნინი ხიჯაკაძე