ფრაქცია ,,ერთიანი ნაციონალური მოძრაობა – ძალა ერთობაშიას” თავმჯდომარის მოადგილე ლევან ბეჟაშვილი პარლამენტში პარტიის სახელით ინიციატივას აყენებს რუსეთის მოქალაქეების საქართველოში შემოსვლის დროს კონკრეტული გადასახადის დაწესებასთან დაკავშირებით:
,,ჩვენი პარტია და საპარლამენტო ფრაქცია გამოდის ინიციატივით, რომ ოკუპაციის შესახებ საქართველოს კანონში შევიდეს ცვლილებები, რომლითაც ჩვენ გავაკეთებთ პოლიტიკურ განაცხადს მიმდინარე პროცესთან მიართებაში.
აღნიშნული კანონპროექტი ითვალისწინებს რუსეთის ფედერაციის მოქალაქეებისთვის საქართველოს ტერიტორიაზე შემოსვლისას საოკუპაციო შენატანის გადახდის ვალდებულებას.
საოკუპაციო შენატანის თანხა ლარებში იქნება განსაზღვრული 1000 ლარის ოდენობით თითოეულ მოქალაქეზე. ამ გადახდის უზრუნველყოფით, ერთის მხრივ – გარანტირებული იქნება რუსეთის ფედერაციის მოქალაქეების მხრიდან აღიარება იმისა, რომ საქართველოს ტერიტორია ოკუპირებული არის რუსეთის ფედერაციის მხრიდან და რუსეთი არის აგრესორი.
იმავდროულად, ეს შენატანი გარკვეული შემაკავებელი ფაქტორიც უნდა გახდეს იმისათვის, რომ თუ მათ არ სურთ ამის აღიარება და არ სურთ თანხის გადახდა, მათ შეუძლიათ საერთოდ არ ისარგებლონ ამ შენატანით და არ შემოვიდნენ საქართველოს ტერიტორიაზე.
ასევე აღნიშნული შენატანის დაწესება იქნება სოლიდარობის გამოცხადება იმ დევნილებისათვის, რომლებიც მრავალი ასეულ ათასობით იმყოფება საქართველოს ტერიტორიაზე.
შესაბამისად, ამ შენატანის გადახდის ვალდებულებისთვის იქნება შექმნილი სპეციალური დევნილთა დახმარების ფონდი. ეს თანხები მიზნობრივად დევნილთა საჭიროებისთვის იქნება გადარიცხული. დევნილთა სამინისტროში შეიქმნება ეს ფონდი”, – განაცხადა ლევან ბეჟაშვილმა.
ავტორი
ნინი ხიჯაკაძე
