“აკელამ ააცილა”: ვლადიმერ პუტინი სამარყანდის სამიტზე – ალექსი ნონიაძის ანალიტიკური შეფასებები

105

მაშინ, როდესაც უკრაინას მთელი ცივილიზირებული მსოფლიო მხარს უჭერს, რუსეთის მდგომარეობა საერთაშორისო ასპარეზზე დღითიდღე სულ უფრო უარესდება. სამარყანდის სამიტმა ნათლად აჩვენა, რომ პუტინის იმიჯი პლინტუს ქვემოთ არის ჩამოსული. რუსეთის ლიდერი ნაცვლად იმისა, რომ ეფექტური ნაბიჯებს დგამდეს ფრონტის წინა ხაზზე, მოსკოვში ფოერვერკებით დედაქალაქის დღეს დიდი პომპეზურობით აღნიშნავდა. რუსულ ჯარს არ აქვს ნორმალური შეიარაღება, ეფექტური სამხედრო ოპერაციების საწარმოებლად საბრძოლო მასალა, ამუნიცია და ასეთ პირობებში პუტინის მთავარი ამოცანა შეხვედრებში კორონავირუსით გათვალისწინებული დისტანციის დაცვა და პირადი უსაფრთხოებაა, რომელიც ხშირ შემთხვევაში კომიზმამდე დაიყვანება. ამ დამოკიდებულებას გრძნობენ რუსი ჯარისკაცები და შანსს ხელიდან არ უშვებენ ფრონტის წინა ხაზი დატოვონ და თავს გაქცევით უშველონ.

კიპლინგის წიგნიდან ცნობილი ფრაზა: „აკელამ ააცილა“, ზუსტად შეესაბამება პუტინის დღევანდელ მდგომარეობას. ყველამ იცის, რომ მან მთავარ სამიზნეს, უკრაინას ააცილა და ამიტომ დიქტატორს შეხვედრების დარბაზში ყველა ალოდინებს, ვისაც არ ეზარება. ადრე თუ განსაკუთრებულ პატივს მიაგებდნენ, დღეს სამიტზე ლიდერების არაფორმალურ შეხვედრის დროს დივანზე ემომალი რახმონოვსა და ალექსანდრე ლუკაშენკოს შორის მორიდებული იჯდა.

ადრე თუ რუსეთს ევრაზიის კონტინენტზე სიტყვა ეთქმოდა და ანგარიშგასაწევ ძალად ითვლებოდა, უკრაინაში განვითარებულმა მოვლენებმა რუსეთს არათუ დიდ რვიანში ადგილი დააკარგვინა, არამედ აზიის რეგიონშიც რიგით სახელმწიფოდ აქცია, რომელსაც უახლოეს ხანში, შესაძლოა, თვით ბელორუსიც კი შეაქცევს ზურგს. ჩინეთის უპირატესობა დედამიწის ამ ნაწილში სამარყანდის სამიტმაც აჩვენა. მომგებიან მდგომარეობაშია თურქეთი და მასთან ერთად აზერბაიჯანიც. ყაზახეთს ზურგს ჩინეთი უმაგრებს. ოფიციალური პეკინის პოზიცია არაორაზროვნია – ცენტრალური აზიის რეგიონი მისი გავლენის სფეროა და სასურველია უკრაინაში ომი რუსეთმა დაასრულოს.

პუტინის გარდა ყველა ხვდება ამ ომის გაგრძელებას რა მძიმე შედეგები შეიძლება მოჰყვეს – ჯერ თავად რუსეთისთვის და მერე მსოფლიო წესრიგისთვის. სამწუხაროდ, მოლოდინი იმის, რომ თავად პუტინი მიხვდება ამას, ნაკლებად სავარაუდოა. იგი ცდილობს ბოლო კარტი გაათამაშოს ევროპაში გაზის მიწოდების შეწყვეტის სახით. დატოვოს “ბებერი ევროპა” ამ ზამთარს გათბობის გარეშე, რითაც ვარაუდობს, რომ ევროკავშირის მხრიდან უკრაინისთვის მხარდაჭერას ბზარი გაუჩნდება. პროცესები კი დაძრულია და საეჭვოა, რომ პუტინის გეგმებს ასრულება ეწეროს.

📷: ინტერნეტიდან

ავტორი
ალექსი ნონიაძე
სააგენტო “პარალელის” ექსპერტი, ანალიტიკოსი

კომენტარები პუბლიკაციაზე