სახალხო დამცველის შერჩევის წესთან დაკავშირებულ ცვლილებებს დღეს პარლამენტი მესამე მოსმენით განიხილავს. ოპოზიციის წარმომადგენლები კი რეგალმენტში ცვლილებს მხარს არ უჭერენ. აღნიშნულ საკითხზე პოლიტიკური შეფასება გააკეთა პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ მიხეილ სარჯველაძემ:
,,მე არ მგონია, რომ მართებული პოზიცია დაიკავა ოპოზიციამ. ვაი თუ არიან ოპოზიციის რიგებში ისეთი დეპუტატებიც, რომლებსაც მიზეზი ჰქონდათ მოსაძებნი იმისთვის, რომ მხარი არ დაეჭირათ, ამ შემთხვევაში, აღნიშნული ინიციატივისთვის?!
იმიტომ, რომ ერთმნიშვნელოვნად ამ ინიციატივას არაფერი აქვს ისეთი დასაწუნი, რომლის გამოც შეიძლება გაამართლოს ვინმემ ამ მოცემულობის პირობებში, როდესაც დეპოლარიზაციის ვალდებულება გვაქვს და რა თქმა უნდა, პასუხისმგებლობაა ეს მათ შორის ოპოზიციისა, მხარი დაუჭირონ ასეთი ტიპის ინიციატივებს, სადაც არგუმენტიც არ აქვთ, რომ ამის წინააღმდეგ გამოვიდნენ.
შესაძლოა, ამ შემთხვევაში ეს იყოს რაღაცა სურვილი, რომ უსაგნოდ ოპონირებისთვის ახალი ფრონტი გაიშალოს“, – განაცხადა მიხეილ სარჯველაძემ.
ინფორმაციისთვის: სახალხო დამცველის შესარჩევად შეიქმნება 9-წევრიანი კომისია, რომელიც წარმოდგენილი კანდიდატურებიდან შეარჩევს და პარლამანტს წარუდგენს 7 კანდიდატს, საიდანაც პარლამანტმა უნდა შეარჩიოს 1 კანდიდატი.
ავტორი
ნინი ხიჯაკაძე
