ტელეკომპანია “მთავარი არხის” ეთერში პირველად გასვლიდან 3-წლისთავზე პატიმრობაში მყოფი არხის გენერალური დირექტორი ნიკა გვარამია თავის პოზიციას ავრცელებს სოციალური ქსელის მეშვეობით, რასაც უცვლელად გთავაზობთ:
“9 სექტემბერი დაიწყო. 2019-ში, ამ დღეს, ზუსტად 21:00, ეთერში პირველად გავიდა “მთავარი არხი”. არასდროს ცხოვრებაში ამდენი ენერგია არ დამიხარჯავს, ამდენი არ მინერვიულია, ასე არ გამოვფიტულვარ. მაგრამ არც არასდროს ასეთ მნიშვნელოვან საქმეში მონაწილეობა არ მიმიღია და არასდროს ვყოფილვარ შედეგით ასე ამაყი და კმაყოფილი.
დღეს, 3 წლის თავზე, მთავარის გუნდმა შეძლო 20 დღეში ტელევიზიის დაარსების რეკორდის მოხსნა და ახლის დამყარება – გაუძლო რამდენიმეთვიან უმძიმეს პერიოდს და არხი არა თუ შეინარჩუნა, არამედ გააუმჯობესა და გააძლიერა.
სწორედ ჩემი გუნდის ეს წარმატება მიმაჩნია ჩემს მთავარ წარმატებად. ყველაზე შესანიშნავი ზუსტად იმის გაცნობიერებაა, რომ სწორი ხალხი შეკრიბე, ვინც შენს გარეშეც შეძლებს საქმის კეთებას!
მიყვარხართ მთავარარხელებო, ვამაყობ თქვენით და ძალიან მენატრებით.
გკოცნით, ნიკა“, – ნათქვამია “მთავარი არხის” გენერალური დირექტორის ფეისბუქის პირად გვერდზე გამოქვეყნებულ პოსტში.
