“სტრატეგია აღმაშენებლის” სახელით, პარტიის გენერალური მდივანი, პარლამენტის დეპუტატი პაატა მანჯგალაძე საგანგებო განცხადებას ავრცელებს და პოლიტიკურ შეფასებას აძლევს საპარლამენტო უმრავლესობის მიერ მოსმენების კანონში ცვლილებების შეტანას:
“ქმედებები, რომლებიც ვიხილეთ მოსმენების შესახებ კანონში ცვლილებებთან დაკავშირებით, ამ კანონის დაჩქარებული წესით მიღება, შემდეგ პრეზიდენტის ვეტოს დაძლევა, ასევე, ავტორიტეტული საერთაშორისო ორგანიზაციების, მათ შორის ვენეციის კომისიის, ჩვენი პარტნიორების: ამერიკის საელჩოს, ევროპარლამენტარების და ჩვენი, ოპოზიციის პოზიციების უგულებელყოფა არ არის გზა ევროპისკენ.
უფრო მეტიც, ეს არის „ქართული ოცნების“ მიზანმიმართული ფარული მოქმედებების ნაწილი და მცდელობა დააზიანონ საქართველოსთვის ევროკავშირის წევრი სახელმწიფოს კანდიდატის სტატუსის მიღების შესაძლებლობა ისე, რომ ამის შესახებ მოსახლეობამ ვერ გაიგოს.
არავითარი გადაუდებელი აუცილებლობა არ არსებობდა იმ კანონის დაჩქარებული წესით მიღების, რომელიც მთავრობას საშუალებას აძლევს გააკონტროლოს მოქალაქეების ფართო წრე განუსაზღვრელი ვადით და ამ ნაწილში სრულად ვიზიარებთ აშშ-ს საელჩოს და ვენეციის კომისიის შეფასებებს.
ასევე, არ არსებობს სახალხო დამცველის შერჩევის წესში არსებული კარგი პრაქტიკისგან განსხვავებული რეგულაციების შემოტანის აუცილებლობა, რაც პარლამენტის თავმჯდომარეს ერთპიროვნულად აძლევს კანდიდატის შერჩევის წესის და იმ სამუშაო ჯგუფის შექმნის შესაძლებლობას, რომელიც მოახდენს სახალხო დამცველის კანდიდატების წინასწარ შეფასებას. ეს, რა თქმა უნდა, გამორიცხავს უფრო მეტი დემოკრატიის, ჩართულობისა და გამჭვირვალობის შესაძლებლობას და პირდაპირ ეწინააღმდეგება ევროკავშირის მოთხოვნას დამოუკიდებელი კანდიდატის შერჩევის პირობების შექმნის, პროცესის გამჭვირვალობისა და ინსტიტუციური დამოუკიდებლობის უზრუნველყოფას, რასაც ბუნებრივია მხარს ვერ დავუჭერთ”, – აცხადებს პაატა მანჯგალძე.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს