,,სტრატეგია აღმაშენებლის“ თავმჯდომარე გიორგი ვაშაძე განცხადებას აკეთებს სახალხო დამცველის კანდიდატის შერჩევის საკითხთან დაკავშირებით და კონკრეტულ განმარტებას აკეთებს იმ მიზეზებთან დაკავშირებით, თუ რატომ არ ერთვება ოპოზიცია მმართველ გუნდთან ერთად განხილვის პროცესში:
,,ქართულ ოცნებასთან“ არაფორმალურ შეხვედრაზე ჩვენ არაფერი განსახილველი არ გვაქვს. პროცედურა დაწყებულია სამოქალაქო სექტორის მიერ.
აქვე ვიტყვი, რომ ეს პროცედურა თვითონ ,,ქართული ოცნების“ მიერ არის დამკვიდრებული წინა სახალხო დამცველის შერჩევის დროს. რა უნდა ვიმსჯელოთ?! რა უნდა განვიხილოთ?! – უნდა დაველოდოთ ვინ წარადგენს საკუთარ კანდიდატურებს. აქედან ავარჩიოთ საუკეთესო და მას უნდა დავუჭიროთ მხარი.
სხვა ყველა პროცესი ეს იქნება მცდელობა ,,ქართული ოცნების“ მხრიდან, რომ რამენაირად გაათრიოს საკუთარი კანდიდატურა სახალხო დამცველის პოზიციაზე.
პირდაპირ გეტყვით, რომ ყველა ოპოზიციურმა პარტიამ განცხადებაც გააკეთა ამასთან დაკავშირებით. მე იმედი მაქვს, რომ არავინ არ უღალატებს საკუთარ პოზიციას და არ გადავა ,,ქართული ოცნების“ მხარეს“, – განაცხადა გიორგი ვაშაძემ.
ავტორი
ნინი ხიჯაკაძე
