პარლამენტისთვის წარსადგენად ცესკოს თავმჯდომარეობის კანდიდატების შერჩევისას საკითხზე პრეზიდენტის, სალომე ზურაბიშვილის გადაწყვეტილებაზე კრიტიკას გამოთქვამს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე მიხეილ სარჯველაძე:
,,რაღაცა დესტრუქციული როლის თამაშის მცდელობაა. იმისთვის, რომ ეს გაიგივდეს დეპოლარიზაციის მცდელობასთან.
მე არ მგონია, რომ ეს წარმატებული მცდელობებია. იმიტომ, რომ ლოგიკურად საფუძველშივე მცდარია უბრალოდ ამ გზით სიარული, როდესაც უკეთეს კანდიდატს უარს ეუბნები მარტო იმიტომ, რომ ოპოზიციამ ამის გულისთვის შეიძლება არ შეგაქოს.
აზრი არ ჰკითხო, საერთოდ აინუნში არ ჩააგდოს ხელისუფლების მოსაზრებები, ეს ბუნებრივია, რომ არ არის სწორი.
ჩემი დაკვირვებით და ღმერთმა ქნას ეს მეშლებოდეს, პრეზიდენტი ცდილობს, რომ მოიპოვოს ოპოზიციის სიმპათია და კეთილგანწყობა.
ამ თვალსაზრისით დგამს ხოლმე ნაბიჯებს, ამ შემთხვევაშიც გადადგა, როგორც ჩანს. შესაძლოა ამით აიხსნებოდეს ეს ნაბიჯი იმიტომ, რომ სხვა ახსნა და არგუმენტაცია ამას ჩემი აზრით ვერ ექნება“, – განაცხადა მიხეილ სარჯველაძემ.
ინფორმაციისთვის: საქართველოს პრეზიდენტმა, სალომე ზურაბიშვილმა პარლამანტს ცესკო-ს თავმჯდომარისა და ერთი წევრის ასარჩევად 2-2 კანდიდატურა წარუდგინა. აღსანიშნავია, რომ პრეზიდენტმა თავმჯდომარის კანდიდატურად მოქმედი თავმჯდომარე გიორგი კალანდარიშვილი არ წარადგინა.
ავტორი
ნინი ხიჯაკაძე
