ბოლო დღეებში მიხეილ სააკაშვილთან დაკავშირებით გაჟღერებულ კონკრეტულ ინფორმაციებს, მათ შორის, მისი პოლიტიკიდან წასვლის თაობაზე, ეხმიანება პარტია “ევროპული საქართველოს” თავმჯდომარე გიგა ბოკერია და კონკრეტულ პოზიციას აფიქსირებს საქართველოს მე-3 პრეზიდენტთან მიმართებაში:
“ჩემი პოზიცია ცნობილია – სააკაშვილი არის პოლიტიკური პატიმარი, ივანიშვილის რეჟიმისვე დეკლარაციით. “არ დავიჭერდით, პოლიტიკაში რომ არ ყოფილიყოო“, ასე თქვა ღარიბაშვილმა [სააკაშვილზე]. მისი პატიმრობა და მას როგორც მოექცნენ, ეს არის ძალიან მძიმე დარტყმა არა მისი მომხრეებისთვის, არამედ, ზოგადად, ქვეყნისთვის.
მაგრამ, ნებისმიერი მიზეზით, ივანიშვილის რეჟიმისთვის, მოწყალების თხოვნა არის კატასტროფა – მორალურად და პოლიტიკურად.
ის, რომ დღეს სააკაშვილია “ნაციონალური მოძრაობის” სახე და სპიკერები არიან: ხაჭაპურიძე, გელბახიანი, თაკო ჩარკვიანი, გუბაზ სანიკიძე და ეს ხალხი, ეს არის მორალური კატასტროფა.
ეს არის ყველა ადამიანის პასუხისმგებლობა, მათ შორის სააკაშვილიც შედის და მისი გარემოცვაც, ვინც ბოლო წლების განმავლობაში აირჩია ეს გზა, რომ ივანიშვილისვე მეთოდებით და ღირებულებების გარეშე უნდა მოიპოვო ძალაუფლება, უნდა დაემსგავსო ივანიშვილს და “ოცნებას”, რომ მოუგო.
აი, ამ არჩევანმა მიიყვანა აქამდე ეს ვითარება და ამაზე პასუხისმგებელია, რა თქმა უნდა, სააკაშვილი, მაგრამ ისინიც, ვინც მის გარშემო – ან ფანატიკური მიზეზებით ან მედროვეობით არიან და ამ ყველაფერს მხარს უჭერდა ან ჩუმად იყო“, – განაცხადა გიგა ბოკერიამ.