საქართველოს მთავრობის ვიცე-პრემიერი, კულტურის მინისტრი თეა წულუკიანი მწვავე კრიტიკასთან ერთად ირონიულ შეფასებებს აკეთებს პრეზიდენტ სალომე ზურაბიშვილთან მიმართებაში, საზოგადოებრივი მაუწყებლის ეთერში მის მიერ გამოთქმული კონკრეტული მოსაზრებების გამო. წულუკიანის აზრით, პრეზიდენტი სცდება კონსტიტუციით განსაზღვრული უფლება-მოსილებების ჩარჩოებს საპარლამეტო მმართველობის მოდელში:
,,შეგვახსენა, რომ არსებობს თურმე საქართველოს კონსტიტუციაში ,,მესამოცდამეთვრამეტე“ მუხლი. ასეთი მუხლი საქართველოს კონსტიტუციას არ აქვს. საქართველოს კონსტიტუციას აქვს 78-ე მუხლი და სახელმწიფო ენაზე ეს სწორად ასე, და არა სხვანაირად, გამოითქმის.
ვერ ვიყოლიეთ საქართველოს ისეთი პრეზიდენტი, რომელსაც ესმის, თუ რა არის პრეზიდენტის კონსტიტუციური უფლება-მოსილებები ისეთ მოდელში, როგორიც საპარლამენტო მოდელია.
რომელი პრეზიდენტიც კი გვყოლია, ამჟამინდელის ჩათვლით და ბევრი არ გვყოლია ჯერ საპარლამენტო მოდელში, ყველას აქვს გარკვეული კომპლექსი. მე ამას კონსტიტუციურ კომპლექსს დავარქმევდი. იმიტომ, რომ ისინი თავს წარმოაჩენენ კანდიდატებად და უნდათ პრეზიდენტობა, მაგრამ როდესაც ხდებიან პრეზიდენტები, საპარალემენტო მოდელში, თვლიან, რომ ეს კონსტიტუცია მათ საქმიანობას გასაქანს სათანადოდ არ აძლევს.
ამიტომ ჩემი რჩევა იქნებოდა, უკვე 2024 წლისთვის, პოტენციური კანდიდატების მიმართ, რომ თუ დააპირებთ ვინმე პრეზიდენტობას, ჯერ წაიკითხეთ საქართველოს კონსტიტუცია.
საჭიროა მან ადვოკატი სასწრაფოდ აიყვანოს, რადგანაც თქვა ის, რაც მას ძალიან შეასუსტებს დავისას. რეალურად მეორე მხარეს მისცა არგუმენტები და გაამართლა რეალურად ის, რასაც ჩვენ, ყველანი, ვფიქრობდით – რასთანაც საქმე გვქონდა.
საქართველოს პრეზიდენტმა გუშინ აღიარა, რომ ის სცილდება თავის კონსტიტუციურ უფლება-მოსილებებს“, – განაცხადა თეა წულუკიანმა.
ავტორი
ნინი ხიჯაკაძე
