“ღარიბაშვილის საჯარო მითითება იყო იმასთან დაკავშირებით, რომ მათ შორის რუსეთიდან შევიძინოთ ნავთობი” – ელენე ხოშტარია

პარტია ,,დროას“ თავმჯდომარე ელენე ხოშტარია სპეციალურ ბრიფინგზე განცხადებას აკეთებს სანქცირებული რუსული ნავთობის ქართულ ბაზარზე შემოსვლასთან დაკავშირებით:

,,ნავთობი არის რუსული სისხლის მანქანის ერთ-ერთი მთავარი დამფინანსებელი. რუსული ომის მანქანა იკვებება სწორედ ნავთობით. შესაბამისად, დასავლეთის ერთ-ერთი მთავარი ამოცანა სანქცირების მხრივ არის რუსეთის ნავთობზე დამოკიდებულების შემცირება.

ამ პირობებში 2021 წელს საქართველოს ნავთობპროდუქტების იმპორტი რუსეთიდან იყო მე-3 ადგილზე, ხოლო ომის პერიოდში რუსეთი გახდა საქართველოს ნავთობ იმპორტიორი პირველი ქვეყანა. პირდაპირ ჩვენ ვაწვდით სისხლის მანქანას ფულს.

გარდა ამისა, მაისში, აპრილთან შედარებით, რუსული ნავთობის იმპორტი გაიზარდა 70%-ით. რაც მთავრია ჩვენ ხაზი უნდა გავუსვათ იმას, რომ საქართველოში საწვავის ფასი არ გაიაფებულა.

ღარიბაშვილის საჯარო მითითება იყო იმასთან დაკავშირებით, რომ მათ შორის რუსეთიდან შევიძინოთ ნავთობი. ერთ-ერთი ყველაზე მძიმე თემა, რაც არის რუსული ომის მანქანის დაფინანსება, საქართველოს მთავრობისთვის არის ღია კავშირის, ურთიერთოებების თემა, რის გამოც ღრმად ვარ დარწმუნებული, რომ არა საქართველო, არამედ ,,ქართული ოცნების“ ოლიგარქიული მმართველობა უნდა იყოს დასანქცირებული“, – განაცხადა ელენე ხოშტარიამ.

ავტორი
ნინი ხიჯაკაძე