საქართველოს პარლამენტის თავმჯდომარე შალვა პაპუაშვილი ჟურნალისტებთან გაკეთებულ კომენტარში შეფასებას აკეთებს პრემიერ-მინისტრ ირაკლი ღარიბაშვილის მიერ სოციალურ ქსელში გამოქვეყნებულ წერილთან დაკავშირებით და ბიძინა ივანიშვილთან მიმართებაში თვითონაც აფიქსირებს პოზიციას, რომ ,,ვინც არ არის ოლიგარქი იმას, რაც არ უნდა ვეძახოთ ოლიგარქი – ვერ გახდება ოლიგარქი“:
,,ვფიქრობ, რომ ძალიან მნიშნელოვანი და დროული მიმართვა იყო. ვინაიდან ჩვენ რასაც ვხედავთ ეს ბოლო პერიოდი არის ის, რომ ამ დეოლიგარქიზაციის ტერმინის გამოყენებით ხდება პირდაპირ შტურმი საქართველოზე, როგორც სახელმწიფოზე.
ის, ვინც ამბობს, რომ ბიძინა ივანიშვილი არის ოლიგარქი, ის ამბობს, რომ საქართველოს ხელისუფლება სინამდვილეში იმართება სხვა ადამიანის მიერ – ეს არის პირდაპირ შეურაცხყოფა ქართული დემოკრატიის.
საქართველოს ხალხის მიერ არჩეული ხელისუფლება მართავს ამ ქვეყანას. იმის თქმა, რომ სინამდვილეში პრემიერ-მინისტრი, პარლამენტის თავმჯდომარე, წევრები კი არ იღებენ გადაწყვეტილებას, არამედ სხვაგან ხდება ამ გადაწყვეტილების მიღება – ეს არის შეურაცხყოფა!
ვერავინ ვერ ასახელებს ვერც ერთ ფაქტს იმასთან დაკავშირებით, როგორ ხდება ამ გავლენის მოხდენა?! რომელ გადაწყვეტილებაზე იყო ეს გავლენა მოხდენილი?! შესაბამისად, ეს არის დეზინფორმაცია.
თქვენ რა გგონიათ, რომ ადამიანი უნდა შემოვსაზღვროთ და კონტაქტი არ უნდა ჰქონდეს არავისთან? არცერთი ადამიანი არ არის კუნძული. ადამიანები ერთმენთთან ურთიერთობენ. ეს არის ჩვენი ცხოვრების ნაწილი. ადამიანს აქვს სოციალური კონტაქტები.
თეთრი ყოველთვის არის თეთრი, შავი ყოველთვის არის შავი. აქ აღქმებს ,მნიშვნელობა არ აქვს. აქ არის ფაქტები. რაც არის თეთრი, ის ვერასდროს ვერ გახდება შავი. ვინც არ არის ოლიგარქი იმას, რაც არ უნდა ვეძახოთ ოლიგარქი – ვერ გახდება ოლიგარქი“, – განაცხადა შალვა პაპუაშვილმა.
ავტორი
ნინი ხიჯაკაძე
