საზოგადოებრივი მაუწყებლის ეთერში განცხადება გააკეთა ,,ქართული ოცნების“ თავმჯდომარემ ირაკლი კობახიძემ. მმართველი პარტიის ლიდერი აცხადებს, რომ თუ უკრაინაში ომი დეკემბრის ბოლომდე დასრულდება, მოიხსნება ემოციური ფონი და შესაბამისად, გაიზრდება შანსები საქართველოსთვის ევროკავშირის კანდიდატი ქვეყნის სტატუსის მისანიჭებლად:
,,ღმერთმა დაგვიფაროს და თეორიულად რომ დავუშვათ – საქართველოში დეკემბრის ბოლომდე ომი იწყება, რა თქმა უნდა, ამ შემთხვევაში გარანტირებული გვექნება კანდიდატის სტატუსი, თუმცა ალბათ დამეთანხებით, რომ ასეთი კანდიდატის სტატუსის მიღებას, ჯობია არ მივიღოთ, არ ღირს.
იმის თქმა მინდოდა, რომ ამ ფაქტორს, ამ სახით ვერ და არ შევცვლით. ბუნებრივი, ოპოზიცია სიამოვნებით გააკეთებდა და ყველაფერს აკეთებენ ამისთვის, მაგრამ ჩვენ ამაზე არცერთ შემთხვევაში არ წავალთ.
იმ შემთხვევაში, თუ დეკემბრამდე დასრულდება ომი უკრაინაში, რა თქმა უნდა, მოიხსნება ის ემოციური ფონი, რომელმაც მათ შორის – საქართველოს საპირისპირო გადაწყვეტილების მიღება განაპირობა ევროკავშირში.
ანუ იყო გარკვეული ემოციური ფონი, რის გამოც უკრაინასა და მოლდოვას მიენიჭა კანდიდატის სტატუსი, ხოლო საქართველოს – არა. დეკემბრის ბოლომდე თუ დასრულდება უკრაინაში ომი, შეიცვლება ეს ემოციური ფონი. ასეთ დროს, რა თქმა უნდა, იზრდება იმის შანსი, რომ ჩვენ მოგვენიჭოს კანდიდატის სტატუსი“, – განაცხადა ირაკლი კობახიძემ.
ავტორი
ნინი ხიჯაკაძე
