„სტრატეგია აღმაშენებლის“ ლიდერები, გიორგი ვაშაძე და სერგო ჩიხლაძე, ბრიუსელში ევროკომისიის წევრებს შეხვდნენ. შეხვედრაზე ევროკომისიის ერთ-ერთი ხელმძღვანელი მიშელ რუპიც იმყოფებოდა. გიორგი ვაშაძის თქმით შეხვედრაზე საქართველოს ევროპული პერსპექტივის შესახებ ისაუბრეს, ასევე კონკრეტულად განიხილეს ევროკომისიის მიერ დაწესებული 12 პუნქტიანი გეგმა და ამ პუნქტების შესრულების გზები.
ოპოზიციონერი ლიდერის თქმით ევროკომისია დიდი ხანია საქართველოს როგორც პროგრესს, ასევე რეგრესს აკვირდება და მათი აზრით აბსოლუტურად შესაძლებელია დეკემბრამდე 12-ვე პუნქტი შესრულდეს, უბრალოდ მათი აზრით ამისთვის პოლიტიკური ნებაა საჭირო, რომ ხელისუფლებამ დაიწყოს ამ ნაბიჯების გადადგმა:
„შეხვედრა გვქონდა ევროკომისიის დეპარტამენტის ერთ-ერთ ხელმძღვანელთან, მიშელ რუპთან. რუპი პირადად იყო ჩართული იმ 12 კრიტერიუმის შემუშავებაში, რომლის დასაკმაყოფილებლად ევროკომისიამ საქართველოს დრო დეკემბრამდე დაუწესა.
ევროკომისიაში ძალიან კარგად არიან ინფორმირებულნი საქართველოს, როგორც შიდა პროცესების, ასევე იმ სიძნელეების და გამოწვევების შესახებ, რომლის წინაშეც საქართველო და ქართული პოლიტიკა დგას.
შეხვედრაზე დეტალურად განვიხილეთ ევროკომისიის მიერ დაწესებული 12 კრიტერიუმი, რუპის აზრით აბსოლუტურად შესრულებადია 12-ვე კრიტერიუმის დეკემბრამდე დაკმაყოფილება, მისი თქმით ყველა პუნქტი ისეა გაწერილი, რომ აბსოლუტურად შეძლებადია საქართველოსთვის ამ კრიტერიუმების დაკმაყოფილება.
ევროკომისიის წევრებმა გვითხრეს, რომ დიდი ხანია საქართველოს როგორც პროგრესს, ასევე რეგრესს აკვირდებიან და სამწუხაროდ ხშირ შემთხვევაში პროგრესის მაგივრად რეგრესია.
რა თქმა უნდა, ხაზი გაესვა აუცილებლობას, რომ ხელისუფლებამ ეს მოთხოვნები უნდა შეასრულოს, კრიტერიუმები, რომლის შესასრულებლად მხოლოდ და მხოლოდ პოლიტიკური ნებაა საჭირო.
ასევე ხაზი გაესვა, რომ საქართველოში როგორც პოლიტიკურ, ასევე პროფესიულ წრეებში არიან ძალიან კარგი პროფესიონალები, რომლებსაც შეუძლიათ ამ 12 კრიტერიუმის სწრაფად დაკმაყოფილება, სამუშაოს ჩატარება. მათი თქმით – განსხვავებით სხვა ქვეყნებისგან პროფესიონალიზმის და ექსპერტიზმის საკითხი საქართველოში ძალიან მაღალია.
კიდევ ერთხელ გვითხრეს, რომ ყველაფერი ახლა დამოკიდებულია საქართველოზე, სამოქალაქო სექტორზე, პოლიტიკურ წრეებზე, ქვეყნის შიგნით აქტიურობაზე, რომელშიც ისინი გარედან ვერ ჩაერევიან მაგრამ, რა თქმა უნდა, რაც შეეხება დახმარებას, როგორიცაა მონიტორინგი და ასე შემდეგ, ისინი მზად არიან ყველა ამ მიმართულებით გვერდში დაგვიდგნენ. უბრალოდ, როგორც ევროკომისიის წევრები გვეუბნებიან, მთავარი პოლიტიკური ნებაა, რომ ხელისუფლებამ დაიწყოს ამ ნაბიჯების გადადგმა“, – აცხადებს გიორგი ვაშაძე.
ინფორმაციას პოლიტიკური პარტია “გიორგი ვაშაძე – სტრატეგია აღმაშენებლის” და საპარლამენტო ფრაქცია “რეფორმების ჯგუფის” მედიასთან და საზოგადოებასთან ურთიერთობის სამსახური ავრცელებს