ანტიკორუფციული მოძრაობის თავმჯდომარე ვასო ურუშაძე ევროპარლამენტის რეზოლუციას და ბიძინა ივანიშვილის მიმართ სანქციების დაწესების საკითხს ეხმაურება:
“მნიშვნელოვანია ევროპარლამენტმა განიხილოს ოლიგარქიული რეჟიმის ვერტიკალში მყოფი ძირითადი საყრდენი პირების დასანქცირება.
არაფორმალური მმართველობის მთავარ წყაროს წარმოადგენს ბიზნესის საფარქვეშ მოქმედი კრიმინალური დაჯგუფებები და მათი ხელმძღვანელები, რომლებიც ახდენენ დიდი ოდენობით შავი ფულის აკუმულირებას.
აღურიცხავი ფინანსური რესურსი კი ძალაუფლების შენარჩუნების, კრიმინალური ჯგუფების დაფინანსების, ამომრჩევენლთა მოსყიდვის და სახელმწიფოს მიტაცების ძირითადი ინსტრუმენტია.
ანტიკორუფციული მოძრაობა ვიკვლევთ აღნიშნული პირების კავშირებს კრემლთან, მათ კორუფციულ და დანაშაულებრივ საქმიანობას საქართველოში, ნეგატიურ გავლენას ქვეყნის ეკონომიკასა და ბიზნეში, რაც ღიად უქმნის საფრთხეს დემოკრატიას და ჩვენს ინტეგრაციას ევროკავშირში.
კვლევის ფარგლებში ასევე მოხდა არაერთი ეკონომიკური სუბიექტის იდენტიფიცირება, რომლებიც ღიად ატარებენ კრემლის პოლიტიკას საქართველოში, ეხმარებიან რუსულ კომპანიებს გვერდი აუარონ დასავლურ სანქციებს და არიან მჭიდროდ დაკავშირებული არაფორმალურ მმართველებთან.
კვლევის შედეგებს შუალედური ანგარიშების სახით ანტიკორუფციული მოძრაობა ეტაპობრივად წარუდგენს საზოგადოებას, მედიას და საერთაშორისო ორგანიზაციებს. ასევე დეტალურ ინფორმაციას მივაწვდით ევროპარლამენტარებს და ევროკავშირის შესაბამის სტრუქტურებს“, – აცხადებს ვასო ურუშაძე.
