„ეროვნული ბანკის საბჭო უნდა გახდეს კიდევ უფრო ქმედითი და აიღოს მეტი პასუხისმგებლობა მაკროეკონომიკური, მონეტარული და ფინანსური სექტორის სტაბილურობის მიმართულებით. საბჭოს წევრობა არ არის პენსიაზე გასვლა და მხოლოდ მაღალანაზღაურებადი პენსია. საბჭოს წევრები აქტიურად უნდა იყვნენ ჩართული ეროვნული ბანკის საქმიანობაში“ – ამის შესახებ პარლამენტის საფინანსო-საბიუჯეტო კომიტეტის თავმჯდომარე ირაკლი კოვზანაძემ კომიტეტის სხდომის დასაწყისში განაცხადა, სადაც ეროვნული ბანკის საბჭოს წევრობაზე საქართველოს პრეზიდენტის მიერ წარდგენილ კანდიდატს ნათია თურნავას მოუსმინეს.
პრეზიდენტის საპარლამენტო მდივანმა, გიორგი მსხილაძემ კომიტეტს ნათია თურნავას კანდიდატურა წარუდგინა.
ირაკლი კოვზანაძის განცხადებით საქართველოს პრეზიდენტის პრეროგატივაა დაასახელოს ეროვნული ბანკის საბჭოს წევრობის კანდიდატურა, კომიტეტი კი იმოქმედებს რეგლამენტის შესაბამისად.
„მოვუსმენთ კანდიდატს, იქნება პროფესიონალური კითხვები და კომიტეტი მიიღებს შესაბამის გადაწყვეტილებას“, – აღნიშნა ირაკლი კოვზანაძემ ბანკის საბჭოს წევრობის კანდიდატის მოსმენის წინ. მისი თქმით, ნათია თურნავა პროფესიონალია მას აქვს კარგი გამოცდილება ეკონომიკურ სფეროში.
„ოპოზიციამ მოითხოვა კომიტეტის სხდომაზე, როცა ჩვენ გვექნება ეროვნული ბანკის წლიური ანგარიშის განხილვა საბჭოს წევრების დასწრება. ჩვენ, შესაბამისი წერილით მივმართეთ ეროვნულ ბანკს და მოვიწვიეთ საბჭოს წევრები. ეს ხაზს უსვამს საბჭოს წევრების უფრო მეტად ჩართულობის მნიშვნელობას ეროვნული ბანკის საქმიანობაში“, – განაცხადა ირაკლი კოვზანაძემ.
საფინანსო-საბიუჯეტო კომიტეტის სხდომაზე ეროვნული ბანკის საბჭოს წევრის თანამდებობაზე ასარჩევად წარდგენილ ნათია თურნავას მოუსმინეს.
ნათია თურნავამ ეროვნული ბანკის საბჭოში საკუთარ ხედვაზე და პრიორიტეტებზე ისაუბრა და დეპუტატების კითხვებს უპასუხა. საფინანსო-საბიუჯეტო კომიტეტმა ეროვნული ბანკის საბჭოს წევრის პოზიციაზე ნათია თურნავას კანდიდატურას მხარი დაუჭირა.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
