ადვოკატი დიმიტრი საძაგლიშვილი კომენტარს აკეთებ საქართველოს მე-3 პრეზიდენტის ჯანმრთელობის მდგომარეობასა და სასამართლო პროცესებთან დაკავშირებით. მისი განცხადებით, მიხეილ სააკაშვილის ამჟამინდელი მდგომარეობა გაუმჯობესების ნაცვლად უარესდება და შესაბამისად სასამართლო პროცესების ჩატარება, ამ ეტაპზე, არამიზანსეწონილია:
,,სამწუხაროდ, მიხეილ სააკაშვილის ჯანმრთელობის მდგომარეობა არათუ უმჯობესდება, არამედ უარესდება. მოგეხსენებათ, რომ დანიშნული გვაქვს ექსპერტიზა. შესაბამისად, ექსპერტები აქტიურად არიან ჩართულნი ამ პროცესში. ვიმედოვნებთ, რომ ეს პროცესი მალე დასრულდება და დასრულდება შედეგიანად.
რაც შეეხება მიხეილ სააკაშვილის სასამართლო სხდომებზე მონაწილეობის მიღებას – მოგეხსენებათ, რომ მისი საქართველოში დაბრუნების შემდეგ აქტიურად იღებდა მონაწილეობას მის წინააღმდეგ წარმოებულ პოლიტიკურ საქმეებზე. ყველა სხდომაზე გამოდიოდა სიტყვით.
შესაბამისად, მას სურვილი აქვს, რომ მომავალშიც გააგრძელოს პროცესებში მონაწილეობის მიღება, როგორც კი ჯანმრთელობის მდგომარეობა ამის შესაძლებლობას მისცემს.
სამწუხაროდ, არ ვართ ამ მომენტთან ახლო ისევ და ისევ ჯანმრთელობის მდგომარეობის გათვალისწინებით.
რეალურად არანაირი აზრი არ აქვს გასვლითი სხდომის ჩატარებას. იმიტომ, რომ მიხეილ სააკაშვილის ჯანმრთელობის პრობლემა არ მოიცავს მხოლოდ რაღაც სასამართლოში მისვლის საკითხს და ამიტომ ეს შემოთავაზება უბრალოდ უშედეგო იქნება“, – განაცხადა დიმიტრი საძაგლიშვილმა.
ავტორი
ნინი ხიჯაკაძე
